Âk năm rlău aơ, trong Quốc lộ 26 gâl hăn rlău ăp xã Ea Phê, Tân Tiến, Krông Pắc n’hanh Ea Knuếc hăn Buôn Ma Thuột (Dak Lak) nar lơn ma lhăt bêng, kol khan mbro. Nău dja khuch tât nău rsong hăn đah nklang nkual n’hanh ăp xã mpeh luh nar bah n’gor, khuch tât nău nchuăn rdeng ndơ tuch tăm, roh đăp mpăn hăn ntung trong, lơn lah tâm ăp khay  klêh sầu riêng. Ntuh kơl n’hao têh hvi tay trong quốc lộ lah nău ŭch geh khlay, ân dơi nkra lor.  

Quốc lộ 26, jong 40km ntơm bah Buôn Ma Thuột, khay dja way lhăt bêng kol khan. Ndeh container, ndeh rdeng ndơ jâk, ndeh công nông n’hanh lĕ ma ndeh honda, lhăt nchep hăn ta trong đŏng. Ăp tơ̆ geh ndeh container rvăch bôk, ta njăr trong dja lơn ma rkhul wăk. Nô Đinh Quang Huy, nuĭh ƀon lan ta xã Ea Knuếc an gĭt:

“Bar pe năm aơ, nău ndeh rsong hăn nchuăn rdeng ndơ tuch tăm, lơn lah sầu riêng, hao âk ƀư jêng nău lhăt bêng, kol khan ndăng măng nar. Gâp dăn đă Ngih dak ơm ntuh kơl pơk hvi trong dja gay nuĭh ƀon lan rsong hăn, nchuăn rdeng ndơ dơh ngăch lơn.”

Nô Trần Văn Định, nuĭh ƀĭt ndeh container đah rlău 10 năm ơm gĭt rdeng sầu riêng tăch n’gluh n’hanh hăn ăp n’gor, nkoch:

“Ntơm nơh, rnôk sầu riêng hôm đêt, hăn bah Krông Pắc tât Buôn Ma Thuột roh nklăp 25 – 30 mnĭt dơm. Yơn aƀaơ, rnoh sầu riêng âk, ndeh rdeng âk ƀư nău lhăt bêng kol khan trong hô, hăn trong jong nklăp 30 km roh tât 1 – 2 mông, mô dơn nê geh rnôk hôm jŏ lơn đŏng. Lah bar bôk ndeh continer ma hăn tâm rhot nsum ri rŭn lĕ trong bah ndeh êng, dŭt klach rvê ngăn. Oh nô ƀĭt ndeh dŭt mpŏng Ngih dak ntuh kơl pơk hvi trong gay nău nchuăn rdeng ndơ dơh ngăch lơn.”

Trung tá Lương Xuân Ngọc, Kruanh rmôt mât njrăng ntung trong mbrô 2 Công an n’gor Dak Lak nkoch gĭt, ntơm nơh, ăp nar dơn geh nklăp 3.000–5.000 bôk ndeh hăn ta trong Quốc lộ 26 hăn rlău ăp xã bah nkuâl Krông Pắc (ơm) hăn Buôn Ma Thuột. Aƀaơ, rnoh dja hŏ hao rlău 10.000 bôk ndeh/nar, tâm nê hang rhiăng bôk ndeh container n’hanh hang rbăn bôk ndeh rdeng ndơ, ndeh công nông rdeng sầu riêng. Trung tá Lương Xuân Ngọc an gĭt, tâm pă mbor trong hăn ta Quốc Lộ 26 aƀaơ lah nău dơn kan rgum tơm bah cảnh sát giao thông:

“Mpôl hên hŏ lor nchrăp tâm pă mbro 3 rmôt pah kan gŭ kâp njrăng, tâm pă n’hanh ntĭm leo trong hăn tâm mông ân ndeh rsong hăn ntơm bah 3h tât 7 mông măng ăp nar. Nkre, tâm pă cán bộ tâm rmôt nkoch trêng, an ƀư rlău 50 nuĭh tơm kho, rlău 150 nuĭh ƀĭt ndeh container n’hanh nklăp 200 rnăk dŏng neh công nông tĭng di quy định rdeng sầu riêng đăp mpăn hăn ntung trong mbluh soih, der bah rsŭn kol êng tĭng ntŭk.”

Quốc lộ 26 jong 151 km, lah njăr trong me nthoi n’gor Dak Lak n’hanh Khánh Hòa, chruh tât trong Quốc lộ 1A n’hanh ndrâm dak lêng rdeng ndơ tuch tăm hăn tât ăp mpông n’har bri mpeh bah lơ. Wa Lương Huy Hoàng – Giám đốc Công ty CP Mât dŏng n’hanh rdâk njêng ntung trong 26 an gĭt, trong quốc lộ dja dơi ntuh kơl pơk hvi tay rlău ăp rơh, jêng geh gâl hvi 11m, geh gâl hvi 9m, du đêt gâl dơn geh hvi 6 mét dơm. Bôk ndeh hao âk ndal tâm rnôk ntung trong mô ăp kôp jêng kol khan lah mô dơi der. Tĭng wa Hoàng, ŭch nkra bah nău dja, ân pơk hvi gâl hôm ƀa ƀă hao 11m, di rnoh trong gưl II, yơn aƀaơ nha mô hŏ dơi tâm pă tơm prăk.

“Mpôl hên hŏ ƀư siƀŭt hao rblang dăn UBND n’gor Dak Lak tâm pă tơm prăk n’hao têh hvi tay gâl trong hăn dja. Rnôk dơi n’hao têh hvi tay, trong mbra mbluh soih đah njăr trong cao tốc (Khánh Hoà – Buôn Ma Thuột) bơi tât, dŭt dơh an nău tăch ndơ tuch tăm, lơn lah sầu riêng. Nău n’hao têh hvi tay gâl trong hăn dja ân geh nklăp 800 rmen prăk, rnoh prăk dja dŏng an rdâk njêng dơm, hôm mbor aih meng trong hŏ ơm dăp rgum jêng mô kâp đă trok tâm ntrơn du.”

Rnôk trong Quốc lộ 26 gâl hăn ntơm bah Buôn Ma Thuột hăn rlău ăp xã Ea Knuếc, Krông Pắc, Tân Tiến n’hanh Ea Phê (Dak Lak) dơi ntuh kơl n’hao têh hvi lam lĕ rngôch, njăr trong hăn dja mbra jêng kô̆ măt nthoi khlay tâm păch pêng ntung trong ta Dak Lak, mbluh nthoi đah trong cao tốc lor bôk năp chruh bri đah dak lêng Buôn Ma Thuột – Khánh Hoà bơi ƀư lôch jêh n’hanh n’glăp dŏng. Ntung trong dơi dăp rgum ăp tŏng mbra pơk luh njăr trong nchuăn rdeng, tăch ndơ tuch tăm, lơn lah sầu riêng, ngăch lơn, đăp mpăn lơn n’hanh dơh soih lơn. Ntơm bah aơ, ntŭk rgum âk play sầu riêng bah Dak Lak mbra geh tay ndơ gay mpăr lot ngai, nsĭt tay nău geh wăng sa âk lơn./.