Măng lơ 21/8, ta Quảng trường Ba Đình, Hà Nội, tiểu ban hăn tahen, hăn nsong ƀư rơh rgum nti rlong hăn tahen tât râng kahgĭt 80 năm Cách mạng khay 8 n’hanh 80 năm Quốc khánh lơ 2/9. Rlău 16.300 tahen, ƀon lan, công an đah 43 rmôt dâk, 18 rmôt hăn, 6 rmôt ndeh pháo tahen n’hanh 8 rmôt ndeh đặc chủng tât râng nti. Ngăn lah, geh nău tâm rgop bâh mpôl tahen Nga, Lào n’hanh Campuchia, mpơl nău kan ueh bâh trong kan nchră nău đah dak bah dih mât rnă njrăng ngih dak bâh Việt Nam. Lôch pe mông nti rgum nsum. Đại tướng Phan Văn Giang, kruanh n’gâng kan mât rnă njrăng ngih dak uănh năl nău mĭn nsrôih n’hanh nău kan răp jăp răng dăng bâh ăp tahen, ngăn lah ăp rmôt dâk gâng du ntŭk, nău ƀư dŭt tâm di. Kruanh n’gâng kan mpơl nău knơm, tâm nar ƀư ngăn, lĕ rngôch tahen mbra ƀư lôch dŭt ueh nău kan geh pă an.