Jêh nar rklaih đăp mpăn, wa Lê Minh Đuông lŏ ƀư nau kan nê lah cán bộ gơih bah nkuăl, đah âk nau kan êng êng. Tâm moh nau kan, wa kŏ nsôih mô rlu gay ma n’hao nau rêh bah nŭih ƀon lan, leo ƀon tơm Hồ Đắc Kiện mô nsrŭng rgâl. Ngoai tâm ăp nau ueh ngăn bah wa tâm rnôk aơ lah ntrŭt dăng nau kan n’hoch leo dak tâm rđŭng, rao kloh dak srat tâm lŏ, pơk trong gay ma ƀon lan tăm dơi ba 2 yan ăp năm. Rnơm nê, nau geh bah rnăk wa rgâl âk, nau geh dơi ƀon lan kŏ ueh, tuch tăm ăp nhoat jêng nau dăng bah Hồ Đắc Kiện tât rnôk aơ. Wa Lê Minh Đuông, nkah:

            ‘Hồ Đắc Kiện jêh rnộk rklaih đăp mpăn lah nkuăl rđŭng, dak srat, neh lơi dơm, nŭih ƀon lan ngăn lah rêh ma nau kan joi nhŭp ka, lŏ ƀư mô geh âk, ri ma mô geh nŭih ƀư, geh knŭng 5-6 tạ dơm. Kônh lah nŭih râng ƀư bôk năp mpeh nau nkra ueh neh tăm tâm Hồ Đắc Kiện, uănh kơt lah nơm ƀư ueh nau n’hoch dak gay ma n’hao nau dơi geh yan tăm. Ntơm năm 1976 tât 1985, rnôk nê kônh ƀư Groi Kruanh hôm, jêh ri ƀư Kruanh UBND xã hĭ ntrŭt dăng nau ntrơn rgâl ân dăng nkuăl neh tăm aơ, ntĭm mbơh ân ƀon lan pah kan jan sa, rgâl nau kan tuch tăm tĭng nau ntrŭnh đă bah Chính phủ”.

            Năm 2012, wa Đuông sĭt rlu ranh, yơn nuih n’hâm “tahen Wa Hồ” tâm săk wa hôm mro. Mô ŭch rlu rlau, wa Lê Minh Đuông, bol ma tâm săk nơm dôl ma geh sôt rmanh, ji rnôk bri srŏ n’ik, yơn wa hôm nsôih nau kan bah Ấp, bah xã. Gay ƀư ueh nau dăng dơi mpeh tuch tăm, ngăn lah tăm ba, wa hôm bonh đă ƀon lan tăm ba rgum, tăm jêng âk gay ma tăch, tâm rgum rgum ƀư nau kan tuch tăm. Ntơm bah nau kan aơ, ƀon lan geh dŏng tĭng nau tuch tăm, dŏng ntil ba geh kơp dơn, ba ueh, kah, poh phân, mât chăm, ngăn lah geh rvăt ba jêh rnôk rek, ba geh âk, rnoh khlay, nau săk geh văng sa âk. Wa Đuông nkoch tay:

            “Rnôk aơ nau geh âk oi hôm, 6-8 tấn/ha, ngăn lah nau blau mât chăm lŏ ba bah ƀon lan rnôk aơ ri ueh ngăn, geh nau blau tă bah ơm, ndri ma đăp mpăn geh dơi âk. Đah nau kan mât chăm, răk uănh ri nŭih ƀon lan tĭng kơt ăp nau blau ƀư kan mhe, rnôk aơ mra dơi lah rlau 80% nŭih ƀon lan geh nau blau dơi tâm nau kan tăm ba hôm”.

            Nau geh rnê ngăn tâm tahen Lê Minh Đuông nê lah bol ma năm lĕ 70, yơn ăp nar hôm hăn tâm lŏ, mbơh pă nau blau tâm nau kan tuch tăm, kơl an nau kan ân rơh mom. Păng lah nŭih leo trong kơt tĭng nau kan tuch tăm mhe, ngăn lah ăp nau kan tăm ba kŏ geh ƀư ma máy ri ăp yan kŏ geh âk, săk geh văng sa prêh. 

            Mô êng lah nŭih tahen jăp, wa hôm lah nŭih cán bộ leo trong lor, nŭih ƀon lan tuch tăm blau ndrel lah nŭih leo trong ang ân rơh mom kơt tĭng. Ăp nau ma wa Lê Minh Đuông hŏ ndrel dôl ƀư mô êng ƀư kloh nau kan “rmanh ma mô mpăn” ma hôm lah nau nkoch ueh bah nau rêh, nau rŏng dak ndrel nau ŭch ƀư nau kan mô rlu kơl an ƀon lan, neh dak. Đah ăp nau nsôih bah săk nơm, wa Lê Minh Đuông geh Đảng, Ngih dak rnê nkhôm pă Huân chương kháng chiến chống Mỹ hạng Nhì, Kỷ niệm chương mât đăp mpăn neh dak, Huy hiệu 50 năm Đảng, ndrel âk bằng khen, săm ƀŭt êng êng...wa Nguyễn Văn Mỹ, Kruanh UBND xã Hồ Đắc Kiện, nkuăl ƀon têh Cần Thơ, mbơh:

            ‘Tahen ơm lah ngoai tâm ăp nau kan, rmôt kan geh nau leo trong ueh, âk nŭih râng nau kan tuch tăm gay ma nchrăp lơn tâm hun hao văng sa, rnăk vâl, tâm nê geh âk tahen ơm tâm tâm rnoh nŭih pah kan jan sa blau, hăn leo lor tâm nau hun hao văng sa, kơt lah ƀư ba nchrăp n’hao nau blau kan, hun hao nau kan, nau tuch tăm, tĭng dŏng nau mhe đah nkô̆ nau n’huch rnoh geh dơi dŏng, n’hao nau geh tâm rnăk vâl, ntơm bah nê, khâm păng lah ăp nŭih leo trong gay ma ƀon lan kơt tĭng nti”.

            Đah nuih n’hâm “Tahen Wa Hồ”, “sôt rmanh ma mô mpăn” mô êng ƀư nau kan tuch tăm blau, tahen ơm, sôt rmanh Lê Minh Đuông hôm lah nŭih leo trong ngăn tâm nuih n’hâm nsôih rlet nau jêr, nuih n’hâm rŏng dak ndrel ŭch nau kơl an nau kan./.