Ôi 27/8, Học viện Chính trị quốc gia Hồ Chí Minh ƀư Tâm nchră khoa học đah nkô̆: “Tuyên ngôn Độc lập – Siƀŭt nchrăp lor lịch sử ntơm rơh đăp mpăn, dah rŏng, rhơn răm bah rnoi nuĭh Việt Nam”. Mpôl tơm ƀư dơn geh rlău 40 nău nsŏng kơl bah ăp khoa học, ntơh măt ăp nhih pah kan Trung ương, học viện, nhih nti đại học tâm lam dak.

Ăp siƀŭt mbơh rgum ƀư kloh ăp rnoh khlay têh bah Tuyên ngôn Độc lập: lah rjăp nău dơi rlăch ndăng rôih dăng bah rnoi nuĭh ta nâm nău rđău kan bah Đảng n’hanh Kruanh Hồ Chí Minh; pơk luh rơh hun hao mhe an rnoi nuĭh, ntơm jâng nsan lơh dơi bah cách mạng Việt Nam. Âk nău rgop lah rjăp nău khlay tât dak bah dih jru hvi bah Tuyên ngôn, mpơl nău wơl geh đăp mpăn, dah rŏng, nău tâm di. Tâm nchră nkoch tât nău ntik n’hao nău mĭn, rnoh khlay mô dŭt roh bah Tuyên ngôn Độc lập, rgop n’hao rnoi nuĭh Việt Nam hun hao ăp tŏng, rhơn răm, tâm ban ndrel đah băl mpôl dak bah dih.