Nar 8/6, lôch nău way ƀư wơt ngăn, ta Nhih pah kan Chính phủ, Thủ tướng Chính phủ Lê Minh Hưng n’hanh Thủ tướng Thái Lan Anutin Charnvirakul hŏ ƀư rgum nchră. Bar Thủ tướng mpơl di nuih n’hâm bah năp nău hun hao bah tâm boh Việt Nam – Thái Lan tâm 50 năm aơ kơp ntơm bah rnôk njêng tâm boh tâm năm 1976; uănh năl tâm boh bar ding aƀaơ dôl ta rơh hun hao dŭt uĕh lăng bah ntơm tât aƀaơ, đah jâng nsing chính trị nâp dăng, tâm  boh wăng sa hun hao ngăch n’hanh tâm nđŭr ƀon lan nar lơn ma krêp dêh.

Tâm trong kan wăng sa, bar kruanh rđău kan tâm ban ŭch an ƀư geh nău tam trong kan “Pe buăt nthoi”; ntrŭt ntrôl buăt nthoi ntung trong, logistics, trong trôk n’hanh pâl nđaih; gŭ mĭn hun hao ăp trong nchuăn rdeng trong ndeh, trong dak meng dak lêng nthoi đah bar dak n’hanh nkual tiểu vùng Mê Công; ntik n’hao tâm n’guăk Ủy ban tâm rgop tăch rgâl Việt Nam – Thái Lan; bah ir mpêr n’gar nking kol tăch rgâl, nta trong dơh nsum an ndơ tăch bar ding; nsrôih ơm tât nsĭt geh tăch rgâl 25 rmen USD n’hanh rƀŏng tât 50 rmen USD tĭng trong rƀŏng tâm ban, nâp dăng. Bar Thủ tướng lah rjăp nău nsrôih an ƀư geh nău tam ăp nău tâm ton hŏ dơi geh, ndơ̆ tâm boh têh jong lam lĕ rngôch Việt Nam – Thái Lan hun hao nar lơn ma jru, ngăn ngăn n’hanh nsĭt geh nău tam, rgop uĕh an đăp mpăn, bah tâm lơh tâm su, tâm boh n’hanh hun hao ta nkual.