Ôi 08/09, ta Nhih pah kan Chính phủ, Thủ tướng Chính phủ Phạm Minh Chính ƀư tơm rơh hop way nkô̆ rdâk njêng pháp luật khay 9/2025, an nău rgop đah 09 trong nchrăp Luật. Lah ta rơh hop, Thủ tướng Phạm Minh Chính an gĭt, ntơm bah bôk năm kan tât aƀaơ, Chính phủ hŏ ƀư 42 rơh hop way nkô̆ rdâk njêng pháp luật, tâm nê, ntơm bah bôk năm 2025 tât aƀaơ, hŏ ƀư 09 rơh hop; mĭn uănh, an nău rgop nklăp 80 hồ sơ trong nchrăp luật, nghị quyết.

Nchrăp ta rơh hop tâl 10, Quốc hội khóa 15, Chính phủ mbra hao rblang dăn Quốc hội nklăp 113 hồ sơ, tài liệu, siƀŭt rblang dăn, siƀŭt mbơh, tâm nê geh 47 trong nchrăp luật, nghị quyết. Ntơm bah aơ tât pơk rơh hop tâl 10, mô hôm âk mông nar, rnoh nău kan ân nchrăp dŭt têh, Thủ tướng an lah, nău dơn kan, nău ŭch ndơ̆ luh dŭt âk, dŭt jêr. Jêng đă ăp bộ trưởng, kruanh nhih pah kan tâm ban bộ ân nsrôih âk, dâk kan lĕ n’hâm suan, nsĭt geh nău dơi gay wat jêh tâm pah kan rdâk njêng, wat jêh trong tĭng, ta năp măt ân đăp mpăn săk blău, năn ngăch ăp trong nchrăp luật, nghị quyết hao rblang dăn Quốc hội n’gluh an dŏng.