Măng 10/9, Thủ tướng Chính phủ Phạm Minh Chính, Kruanh Rnâng kan rđau kan Ngih dak ăp ntŭk kan, nau kan tơm khlay bah neh dak, ntŭk kan gung trong nchuăn rdeng ƀư tơm rơh rƀŭn tal 20. Rơh rƀŭn geh ƀư trực tuyến đah 27 n’gor. Tât rnôk aơ, lam dak geh 2.476 km trong hăn ngăch. N’gâng kan ndâk nkra ndrel ăp n’gor dôl ntrŭnh ƀư 733km hôm e tâm 22 nau kan. Tâm rơh rƀŭn, ntoh măt ăp nkuăl, ntŭk ƀư nau kan dăp rgum n’gâng kan 2 gưl geh nau dơi ƀư nau ngăch ntrơn leo gay ma geh ntŭk nkra trong, pă tơm prăk dŏng ăp nau kan; ntoh nau nsôih ntrŭt dăng nau ntrŭnh ƀư... Nkre mbơh du đê̆ nau kan âk hôm e tâm rnôk tât yan mih, khuch tât nau ngăch ƀư kan. Ntoh nau tâm nar rƀŭn, Thủ tướng Phạm Minh Chính lah rjăp nkô̆ nsôih hun hao yơn ân nâp, tâm nê, pă tơm prăk ntuh kơl lah du nau nsôih ntrŭt dăng hun hao.

Ăp n’gâng kan, ntŭk kan, n’gor đah nuih n’hâm “ndach, ndal” lơn tay, ntrŭt ngăch nau ƀư ăp nau kan tơm. Thủ tướng đă ân ƀư rjăp nau kan pă gưl, pă nau kan “n’gor ntrŭnh, n’gor ƀư, n’gor ndơn nau kan”. Thủ tướng đă ân nsôih ntrŭnh ăp nau kan gay ƀư jêh tâm di ăp nau kan, đah nkô̆ 3000 km trong hăn ngăch ndrel 1.700 km trong êp dak lêng, đăp mpăn ƀư jêh nau kan Trong ndeh mpăr lam ntur neh Long Thành tâm năm 2025. Thủ tướng kŏ nkah, ăp tơm ntuh kơl ân đăp mpăn nau nâp ngăch kan, răk ntŭk kan, đăp mpăn pah kan tĭng tâm di nau ntrŭnh./.