UBND xă Hòa Phú, n’gor Đắk Lắk lĕ ƀư jrô tiăr nti an rlău 140 nuĭh nti lah cán bộ hành chính n’hanh ntoh măt doanh nghiệp ta lam xă. Dâk jrô nti lah ăp nuĭh way kan công nghệ, nuĭh nti mô knŭng dơi nkoch mpeh công nghệ AI ma hôm dơi ntĭm kơt dŏng AI tâm mkra nău kan na nê̆. Wa Nguyễn Trung Hòa-Nai Ngih samƀŭt Cao đẳng Công thương Miền Trung, na nê̆ râng ntĭm, an gĭt:

Nău êng ngăn bah jrô nti aơ nkôp đah âk jrô ntĭm nti êng lah nuĭh nti dơi kơt dŏng dâl jêh nti. Mpôl hên mô hăn tĭng trong ntĭm công chức geh ơm, ma kơl nuĭh nti wât trong tâm ngơi di AI gay dơi geh săk rnglăy kơt mpŏng ŭch. Ăp cán bộ, ăp doanh nghiệp dơi ndâk ƀư an nơm du “hê ntop kơl AI” êng nơm, ntop kơl mkra nău kan êng nơm n’hanh săk rnglăy.

Tĭng kruanh xă Hòa Phú, ăp nar bôk năp nău ƀư tĭng ntrong ƀư n’gâng kan ƀon lan 2 gưl, ƀon lan mâp âk jêr jŏt tâm mkra samƀŭt hành chính an nuĭh ƀon lan n’hanh doanh nghiệp. Dŭt âk yor mô tŏng cán bộ way kan. Cán bộ lah nuĭh ơm yơn nău kan mhe, ăp jrô kan knŭng đêt nuĭh yơn dơn nău kan bah âk ntil jêh rnôk nglăp nsum.

Bah nău đă nĕ, kruanh xă Hòa Phú mĭn ŭch đêt nuĭh ma ƀư geh âk nău kan ri an blău dŏng công nghệ mrô. Tâm nĕ, dŏng nău mĭn mhe-AI lah du trong mkra uĕh. Xă lĕ janh jă ăp nuĭh way kan mpeh rgâl mrô n’hanh AI sĭt tiăr nti, đah nuih n’hâm “Jêh nti lah an dơi ƀư dâl”. Wa Đỗ Xuân Hiếu-Groi Kruanh UBND xă Hòa Phú, n’gor Đắk Lắk nkoch:

Jêh tiăr nti, mpôl hên đă ăp cán bộ, công chức an geh du “ntop kơl AI” êng gay dơi rhŏ nău kan. Bah năp đaơ, du trong nchrăp ŭch đêt ngăn du nar nchih rgum, yơn đah AI knŭng roh 30 giây. Nău hôm ƀa ƀă lah nău mĭn, hôm nău kan lĕ geh “ntop kơl”.

Mô êng ta xă Hòa Phú, ta phường Tân An, n’gor Dak Lak nău kơt dŏng công nghệ AI mkra samƀŭt hành chính ntơm mât uĕh săk rnglăy. Yuh Văn Thị Anh Đài-chuyên viên hành chính công phường Tân An an gĭt:

Băng: Kơt dŏng công nghệ AI lĕ nta nơih na nê̆ an cán bộ way kan n’ăp nuĭh ƀon lan. Đah cán bộ, mpôl hên dơh uănh nđôi nău dơi mkra, mĭn lah samƀŭt rhăch nău mpeh tâm nău dơi mkra bah gưl xă. Đah nuĭh ƀon lan, AI ntop kơl uănh joi n’hanh dơi gĭt samƀŭt dơi ƀư ta ntŭk dâl, bah nĕ ntêm nkrem mông nar n’hanh dơh lơn tâm mkra hành chính.

N’hêl na nê̆ an saơ, nău kơt dŏng AI n’hanh nău blău mrô mô knŭng kơl n’hŭch nău jêr an rmôt cán bộ công chức bah dâng, ma hôm nsĭt nău ŭch, dơh an nuĭh ƀon lan n’hanh doanh nghiệp rnôk ƀư tĭng samƀŭt hành chính. Wa Phạm Thị Hồng Hải, du hê nuĭh ƀon lan ta phường Tân An, n’gor Dak Lak uănh lah:

Nar aơ rnăk wâl gâp tât ƀư samƀŭt neh ntu n’hanh chứnh thực samƀŭt săk nơm. Bôk năp hôm rhing rhưng, yơn dơi cán bộ ntĭm dŭt n’hâm tĭng gưl jêng samƀŭt rhăch nău jêh dŭt ngăch. Jêh rnôk ndơ̆ dâl, gâp dơi ton ta điện thoại đah nar mplơ̆ jêh na nê̆, dŭt dơh.

Gay nău kơt dŏng công nghệ hăn lăp ngăn ngên, nău hăn ndrel bah ăp doanh nghiệp viễn thông-công nghệ lah dŭt n’hâm khlay. Năm bah năp, ăp doanh nghiệp viễn thông lĕ dŭt n’hâm lăp nsum đah n’gâng kan ƀon lan ăp ntŭk ƀư nău kan nĕ. Ƀĭt joet lah Viettel Dak Lak lĕ tâm rgop đah n’gâng kan ƀon lan mbơh ƀư âk trong mkra rgâl mrô, rhŏ an săk rnglăy an ntrong ƀư n’gâng kan ƀon lan 2 gưl. Wa Nguyễn Thanh Bình-Groi Giám đốc Viettel Dak Lak an gĭt:

Mpôl hên lĕ pă an trong mkra ntop kơl an cán bộ, công chức, viên chức, rgum tâm rlău 2.000 nău kan geh tât 23 nghị định mhe mpeh pă gưl, pă nău dơi bah Chính phủ. Ntop kơl mhe aơ kơl cán bộ ƀư nău kan di tĭng nău ntrŭnh pháp luật, nkre n’hao săk rnglăy nău kan.

Đah nuih n’hâm “Jêh nti an dơi ƀư dâl”, ăp jrô tiăr nti công nghệ mrô kơt ta xă Hòa Phú mô dah phường Tân An bah n’gor Đắk Lắk dôl pơk luh trong hăn mhe, kơl cán bộ gưl xă mô knŭng n’hao blău mrô, ma hôm rgâl nău mĭn, nchrăp lor gĭt tât công nghệ gay rhŏ an nuĭh ƀon lan uĕh lơn tâm lvang mhe. Aơ lah trong ƀư na nê̆ gay ăp ntŭk ta n’gor mbơh ƀư săk rnglăy Nghị quyết 57 bah Bộ Chính trị mpeh khoa học-công nghệ n’hanh rgâl mhe mĭn njêng mhe.