Kêng măng 27/8 ta Hà Nội, ƀư lễ nkah ndray 80 năm nar njêng Bộ Nội vụ n’hanh Đại hội Tâm rlong rŏng dak bôk năp, gay nkah tay njăr trong hăn n’gloh ang n’hanh nkah gĭt ăp rơh kơn kruanh rđău kan, công chức, viên chức,... n’gâng kan nội vụ gay nsing nâp jâng chuat lăp tâm rơh hun hao mhe đah nđơr geh an du Việt Nam dăng janh.

Ntơh măt ăp kruanh rđău kan Đảng, Ngih dak ntăm an Huân chương lao động hạng Nhất an Bộ Nội vụ, Tổng Bí thư Tô Lâm lah rjăp, bol moh ta rơh – rơh tâm lơh mô lah hŏ bah tâm lơh aƀaơ, rdâk njêng mô lah rgâl mhe – n’gâng kan nội vụ way lah mpôl kan du nuih n’hâm jăp tĭng, kan lĕ nuih n’hâm, blău mhe, rgop nta trong dơh an jâng nsing mât bôk kan neh dak n’hanh mât chăm ăp tŏng an lam nău rêh. Tổng Bí thư đă lam n’gâng kan nội vụ ntik n’hao tay nău khlay kan rgum tơm tâm nău nsŏng kơl n’hanh tĭng ƀư trong kan lam rêh jêng kon nuĭh đăp mpăn lam lĕ rngôch, nkrum lam, nsĭt geh nău dơi; rgâl mhe jru hvi pah kan tâm rlong – nkhôm rnê gay njêng luh ăp trong leo tâm rlong jru hvi, geh suan rlay kah têh, ndâk tay nău nđơr n’groh an tâm rơh hun hao mhe; lơn lah, dâk leo lor tâm trong rgâl mbrô, rgâl dơh glêh siƀŭt, jêng ntĭt leo lor lam trong kan.