Kahgĭt 80 năm nar cách mạng khay 8 geh nău dơi n’hanh Quốc khánh 2/9, 80 năm nar way ơm mpôl kan công an nhân dân Việt Nam n’hanh 20 năm nar tâm mâp lĕ ƀon lan mât rnă njrăng ngih dak, ôi lơ 14/8 ta xã Tân Trào, Tuyên Quang geh ƀư nar tâm mâp lĕ ƀon lan mât đăp mpăn rnă njrăng Ngih dak năm 2025 n’hanh sa nkra rup ndah “Wa Hồ ta Tân Trào”. Ntoh ngơi ta nar tâm mâp, Tổng Bí thư Tô Lâm lah na nê̆, nar tâm mâp lah rơh gay ma nkhah tay nău kăl e, kahgĭt, lah ueh n’hanh mpơl lah na nê̆ nău khlăy, nău tâm rgop têh bâh ƀon lan tâm nău kan mât đăp mpăn rnă njrăng ngih dak, mât đăp mpăn rnă njrăng nău rêh jêng, an geh n’hao tay nău way ơm khlăy nĕ ta rơh kan mhe, rơh têh ndrŏng, lăp kan ndrel n’hanh hun hao. Gay ma dơi geh n’hao soan dăng bâh ƀon lan, nău kan tơm khlăy bâh mpôl kan Công an nhân dân tâm nău mât đăp mpăn rnă njrăng, Tổng Bí thư đă n’gor Tuyên Quang, xã Tân Trào an geh mât uănh, ƀư tĭng răng dăng ăp nău ntrŭnh bâh Đảng, Ngih dak mpeh rdâk njêng nău kan lĕ ƀon lan mât đăp mpăn rnă njrăng Ngih dak, gĭt na nê̆ nău mĭn nău way sŏk ƀon lan ƀư tơm, ƀon lan lah ntŭk tơm khlăy n’hanh lah nău tơm bâh nău kan mât đăp mpăn rnă njrăng Ngih dak, cách mạng lah nău kan bâh ƀon lan, yor ƀon lan, an ƀon lan.