Kêng măng 30/7, ta Nhih pah kan Trung ương Đảng, Tổng Bí thư Tô Lâm hŏ wơt wa Gautam Adani, Kruanh Tập đoàn Adani Ấn Độ. Ta rơh wơt, Tổng Bí thư Tô Lâm lah rjăp bar dak tâm nkoch âk nău tâm ban ŭch tâm trong nchrăp hun hao neh dak, ndrel ndơ̆ rnoh tât jêng dak hun hao têh uĕh mhe da dê lôch 100 năm njêng dak (đah Việt Nam lah năm 2045, đah Ấn Độ lah năm 2047), jêng ân n’hao dăng lơn đŏng tâm boh ta ăp trong kan; lơn lah ntrŭt ntrôl tâm boh wăng sa, tăch rgâl, ntuh kơl tât di đah săk geh.

Tổng Bí thư Tô Lâm rnê âk Tập đoàn Adani uănh khlay n’hanh rdâk njêng trong nchrăp ntuh kơl jŏ jong ta Việt Nam, bah nê rgop n’hao dăng tâm boh, krêp dêh bar jâng wăng sa Việt Nam n’hanh Ấn Độ. Tổng Bí thư nchih nkah ăp nău dăn đă Tập đoàn, dăn đă Tập đoàn lor nchrăp pah kan đah ăp n’gâng kan, ăp n’gor geh nău dơi kan gay tâm ôp, ƀư kloh ăp nău ŭch geh, trong rƀŏng tâm boh, ntơm bah nê ntrŭt ntrôl an ƀư ngăch ăp trong nchrăp kan ntuh kơl ta Việt Nam.