Radio nău ngơi Việt Nam way n’hao êng săk lah nhih pah kanh báo chí dâk bôk năp tă bah wa Hồ njêng lôch Cách mạng khay Pham, krêp dêh đah lịch sử hun hao bah neh dak n’hanh geh nău rgop khlay tâm 80 năm aơ.   

Đêt nar lôch Lễ Tuyên ngôn Độc lập 2/9/1945, tâm 11 mông 30 mnĭt nŭng nar 7/9/1945, bản nhạc hiệu “Nkhĭt phát xít” bah nhạc sĩ Nguyễn Đình Thi n’gloh ta mbrô pơk ƀoh, ntơm pơk nău ngơi lor bôk năp bah Radio nău ngơi Việt Nam.

Gay geh du rân hăn lăp tâm lịch sử nê lah ăp nar pah kan mô gŭ rlu bah du rmôt cán bộ, rnôk tâm săk kơt lah mô geh du ntil ndơ rlău ma nău nđơr lĕ nuih n’hâm n’hanh bôk rngok blău njêng ƀư mhe. Du jrô pah kan hvi 30m², du mblâm micro, bar pe tăng âm kơi nkra ƀư têh hvi tay n’hanh ndăn dŏng ăp blah phôi mbli nching wăr hŏ jêng jrô rhôp nău  ngơi lor bôk năp bah Radio nău ngơi Việt Nam.

Nar 2/9/1945, rnôk Wa Hồ rŏ Tuyên ngôn Độc lập, ăp kỹ thuật viên hŏ rhôp ƀoh sŏng dăng nău nteh ngơi bah Quảng trường Ba Đình tât hang rkeh play nuih, bol ndơ ƀư ƀơch rgơm n’hanh dŭt jêr jŏt.

Ntơm bah kêng dŭt năm 1946, rnôk lam dak dâk lơh Prăng, Radio nău ngơi Việt Nam lăp tâm ăp năm khay mha êng: ntrơn du mbro gay mât đăp mpăn ndơ ntrŭp dŏng, mât nâp mbrô ƀoh nău ngơi. Kơp êng 9 năm dâk lơh Prăng, Radio hŏ 14 tơ̆ ntrơn hăn, bah Bạch Mai tât chùa Trầm, lôch nê Bó Lù - Ba Bể, Hát Môn…

Lôch bah kơi năm 1975, neh dak dơn ngoăy, Radio nău ngơi Việt Nam lăp tâm rơh dâk jêng tay n’hanh pơk hvi. Ntơm bah năm 2009, tĭng ƀư pơk ƀoh nău ngơi Dak lêng nkrum lam mbrô ƀoh 3 nkual dak lêng lah nkual Hoàng Sa, Trường Sa n’hanh vịnh Thái Lan. Năm 2020, Radio nău ngơi Việt Nam rdâk njêng N’gâng pơk ƀoh nău ngơi nkual Nam Trung bộ gay pơk ƀoh mbrô VOV1, VOV5 (tiếng Anh n’hanh tiếng Trung) ƀoh nkrum lam nkual ndru dak lêng Trường Sa ma mbrô ƀoh dêh dah găp (MW), rgop nkoch trêng nău lư, đăp mpăn rnă njrăng chính trị n’hanh năl di ƀư tơm neh dak ta dak lêng.

80 năm aơ, ntơm bah micro jê̆ tât mbrô ƀoh nkrum lam dak, Nău ngơi Việt Nam n’gloh mbro, mbăk ăp ntung njŏ nău ngơi tât rkeh play nuih. Wa Phạm Mạnh Hùng – Groi Tổng Giám đốc Radio nău ngơi Việt Nam lah kloh: Radio nău ngơi Việt Nam way n’hao êng săk lah nhih pah kan báo chí lor bôk năp tă bah Wa Hồ njêng bah kơi Cách mạng khay Pham, krêp dêh đah lịch sử hun hao bah neh dak n’hanh rgop khlay tâm 80 năm aơ:

Lịch sử hun hao 80 năm aơ bah Radio nău ngơi Việt Nam, ntơm bah rơh pơk nău ngơi lor bôk năp nar 7/9 năm 1945 tât rơh rgâl mhe aƀaơ. Rnôk nê nơh Radio lah nhih pah kan báo chí lor bôk năp dơi Wa Hồ njêng tâm n’gâng kan mhe. Lôch nê lah Radio krêp dêh đah dŭt âk nar têh khlay bah neh dak, kơt rơh rdâng lơh Prăng, jêng tât geh nău dơi năm 1954, tât rơh mprơh Mỹ kơl neh dak jêng tât geh nău dơi têh khay năm mhe năm 1975. Hôm ăp rơh rgâl mhe ri nău râng bah lĕ rngôch phóng viên, biên tập viên bah Radio đah nău ntroh n’gôr an ăp trong ntĭt leo mhe mpeh hun hao wăng sa gay rgop ndrel báo chí lam dak, ndrel nău lư, ndrel Đảng n’hanh Ngih dak hăn tât du rơh rgâl mhe lam lĕ rngôch neh dak n’hanh lĕ ma tâm rơh mpeh pơk mpông lăp rgum lam ntŭr neh n’hanh ntơm nchrăp an rơh hun hao lhung jong.    

Lăp tâm rơh mhe, Radio nău ngơi Việt Nam uănh khlay tĭng ƀư nkoch trêng nău lư, nkoch trêng, rgop mât njrăng neh dak n’hanh hun hao neh dak, rƀŏng tât ăp n’gâng ntơm 100 năm njêng Đảng Cộng sản Việt Nam n’hanh 100 năm njêng dak Cộng hòa xã hội chủ nghĩa Việt Nam. Aƀaơ Radio njêng nkre báo in, báo điện tử, pơk ƀoh nău ngơi, nkô̆ mbrô; ntik n’hao suan dăng way ơm gay jêng  nhih pah kan báo chí tơm, ƀư njêng nkô̆ tơm, nsing nơm, way blău kan, geh nău dơi têk ndrêng nău lư, kơl lam nuĭh wât kloh lơn săk tơm nar têh khlay tâm dak n’hanh dak bah dih, njêng nău tâm ban lam rêh jêng kon nuĭh, rdâk tay nău tâm rnglăp n’hanh rêng nău nđơr an lam nuĭh ƀon lan.

Lah ta ntŭk ƀư pla n’hơ “80 năm Radio nău ngơi Việt Nam hăn ndrel neh dak”, wa Đỗ Tiến Sỹ, Ủy viên Trung ương Đảng, Tổng Giám đốc Radio nău ngơi Việt Nam lah rjăp:

Radio nău ngơi Việt Nam đah nău ƀư lah nhih pah kan báo chí tơm gưl neh dak mbra dŏng tay ăp công nghệ dŭt mhe gay tĭng ƀư nău dơn kan chính trị dơi jao n’hanh tĭng ƀư ăp trong nchrăp kan, bôk nău kan tâm boh geh tât, rgop rdâk tay nuih n’hâm n’hao êng săk rnoi nuĭh, hŭr tŏ nuih n’hâm rŏng dak, rêng lam nău nđơr đăp mpăn n’hanh nău nsing nơm nâp dăng tâm hun hao let năp tay hun hao ndrŏng dăng tâm rơh hun hao lhung jong săk bah rnoi nuĭh Việt Nam.