Kêng măng nđaơ 8/9, UBND n’gor Gia Lai ƀư rƀŭn nchră uănh lah nu nău wăng sa rêh jêng khay 8. Rup ndah wăng sa bah n’gor Gia Lai geh ntŭk ang, an ntrôl dăng pă an prăk ntuh kơl nsum mhe dơi geh nău rƀŏng hao jêng 8% lĕ năm. Tĭng nău mbơh, rnoh mrô nkra njêng công nghiệp khay 8 bah n’gor Gia Lai hao 6,8% nkôp đah rơh aơ năm e; pâl nđaih hao dăng đah 9,8 rkeh năch, hao 16%; geh prăk tăch n’gluh geh rlău 2,18 rmen đôlar, tâm ban 3/4 trong nchrăp năm. Sŏk ndơ̆ tơm prăk 8 khay geh rlău 18.395 rmen prăk.

Bôl ndrĭ, rnoh pă an prăk ntuh kơl nsum ta Gia Lai mhe geh rlău 60% trong nchrăp. Âk nău nchrăp ƀư khlay mâp wăk kol mpeh samƀŭt, sŏk neh n’hanh ngăch rdâk ƀư. Ta năp nău ngăn aơ, wa Phạm Anh Tuấn, Kruanh UBND n’gor Gia Lai đă rgum nsrôih an ăp ndơ ƀư ntung trong khlay. Kruanh ăp n’gâng kan, nău kan, ƀon lan an ntĭm rđău na nê̆, uănh nđôi, kơp uănh tĭng nău nchrăp ƀư; ƀư trong nchrăp pă an prăk na nê̆ tĭng lvang gay ngăch dôh rklaih jêr jŏt.