xã nkual jru ngai Ea Drông, n’gor Dak Lak, kơt nti n’hanh ƀư tĭng nuih n’hâm uĕh lŏng, trong gŭ rêh Hồ Chí Minh hŏ jêng trong leo jru hvi, ring lam dăng tâm mpôl kan Đảng n’hanh nău rêh nsum mpôl ƀon lan. Mô dơn n’glĕ ta nău lah ngơi dơm ma mbung, ăp chi bộ hŏ ƀư jêng ngăn ngăn tĭng nti kơt Wa ma ăp nău kan na nê̆, rdâk tay nuih n’hâm dơn kan, nău mĭn nsan hao n’hanh nău nđơr n’groh an bah cán bộ, đảng viên. Ntơm bah nê rgop rgâl muh măt ƀon lan, mât chăm nău rêh ƀon lan.

Hăn ta trong bê tông têh hvi, srăch uĕh, wa Y Lisa Niê, Bí thư chi bộ buôn Tung Krăk, xã Ea Drông, n’gor Dak Lak an gĭt, aơ lah nău dơi geh bah nău tâm ban n’hanh nsum suan bah cán bộ, đảng viên n’hanh ƀon lan. Njăr trong bê tông jong 130m, Ngih dak ntop kơl lŭ săp, xi măng, nuĭh ƀon lan rvăt êng choih ra ka, bôr lâng n’hanh rgop rlău 100 nar luh kan gay ƀư wat jêh, dơh ntơ an nău rsong hăn, nchuăn rdeng ndơ tuch tăm n’hanh rgop rgâl muh măt ta thôn ƀon.

Đah nău ƀư lah Bí thư chi bộ, gâp hŏ nchră đah nuĭh ƀon lan gay ƀư trong tâm lŏ sre, aơ lah nău dơi gay nuĭh ƀon lan geh dŏng, kơl rsong hăn dơh ntơ lơn. Gâp ƀư rgum hop ƀon lan, nkoch trêng rgŏ jă n’hanh dơi ƀon lan n’grŏ tĭng, rgop ăp rnăk 600.000 rbăn prăk, đah 80 rnăk râng rgop. Nơm geh tay tơm prăk ntop kơl bah ngih dak jêng trong hăn hŏ ƀư lôch jêh”.

Trong bê tông ta buôn Tung Krăk lah ngoăy tâm ăp ndơ ntĭt leo ƀư ntoh lư tâm kơt nti n’hanh ƀư tĭng nău Wa ta xã Ea Drông, n’gor Dak Lak, mpơl nău ntĭt leo lor bah cán bộ, đảng viên tâm rdâk njêng ƀon lan mhe ta ntŭk. Ma nău rong neh ƀư trong n’hanh rgŏ jă ƀon lan râng rgop, khân păng hŏ dơi nsing nơm n’hanh tâm ban ŭch bah nuĭh ƀon lan, kơl an trong hăn mbluh soih.

Mô dơn tâm rdâk njêng ƀon lan mhe, nău kơt nti n’hanh ƀư tĭng nău Wa xã Ea Drông hôm dơi mpơl ma nău mât chăm an nuĭh ach o đŏng. An ƀư ăp bôk nău kan gưl neh dak mpeh n’hŭch ach o, xã Ea Drông hŏ geh ăp trong ntop kơl kon si ntil, rdâk njêng jay gŭ, an manh tơm prăk bah Ngân hàng chính sách xã hội. Ăp trong kơl dja hŏ nta trong dơh gay nuĭh ƀon lan hun hao wăng sa, rgâl geh nău rêh. Nơm geh kơt nê, rnoh âk rnăk ach o bah xã hŏ hŭch ntơm bah 280 rnăk tâm năm 2024 jŭr hôm 214 rnăk tâm năm aơ. Wa Y San Niê Kdăm, Kruanh buôn Ea Kjoh A, xã Ea Drông, n’gor Dak Lak, an gĭt:

“Ăp rnăk mpeh săk ach o dơi geh nău mât uănh khlay da dê, ntop kơl bah n’gâng kan ta ntŭk gay hun hao mât rong, tuch tăm. Ntơm bah năm 2023 tâm buôn Ea Kjoh A geh 16 rnăk dơi ntop kơl be ntil, ăp rnăk 8 mblâm. Khân păng hŏ nsrôih mât rong, yơng ntil. Rnôk be têh n’hanh geh rnoh khlay ri khân păng hăn tăch, dŏng prăk nê gay năp nău rêh, rgum mon jay, mât nti oh kon nti ren. Nău rêh đăp mpăn, khân păng rvê pah kan jan sa, tĭng jăp ăp trong nchrăp, trong kơl pháp luật bah ngih dak”.

Xã Ea Drông aƀaơ dơi njêng nsing ta nău n’glăp tay bar xã Ea Drông ơm n’hanh Ea Siên, geh 21 thôn buôn, bơi 24.000 nuĭh, tâm nê rlău 70% lah nuĭh rnoi mpôl đê̆. Đảng bộ xã geh bơi 900 đảng viên sinh hoạt ta 52 mpôl kan.

Đah nuih n’hâm nsan mhe, nău dơn kan mhe, nău kơt nti n’hanh ƀư tĭng nuih n’hâm, trong gŭ rêh Hồ Chí Minh jêng trong sro tâm pah kan rđău đă, mpơl tâm tĭng nău kan na nê̆ bah ăp cán bộ, đảng viên. Nô Hoàng Văn Dụng (rnoi Nùng), cán bộ văn phòng Hội đồng nhân dân, UBND xã Ea Drông, n’gor Dak Lak nkoch:

“Kơt nti n’hanh ƀư tĭng nuih n’hâm uĕh lŏng Hồ Chí Minh mô dơn lah nău lah ngơi dơm ma mbung ma ân tĭng ƀư ma nău kan ngăn ngăn ăp nar ma ndơ he ƀư. Lah du hê đảng viên mom, ma rnôk pah kan, gâp nsrôih dŏng khoa học công nghệ thông tin tâm nău kan, way rƀah gĭt nău lư rgâl ăp nar gay ban tĭng nău kan, nsrôih ƀư wat jêh nău dơn kan dơi jao”.

Wa H Thúy Mlô, Groi Bí thư Đảng ủy xã Ea Drông, an gĭt nău kơt nti n’hanh ƀư tĭng nău mĭn, nuih n’hâm uĕh lŏng, trong gŭ rêh Hồ Chí Minh ta ntŭk hŏ jêng rĭng grep, njêng nău rgâl uĕh tâm pah kan rdâk njêng Đảng.

“Nău kơt nti, ƀư tĭng nău Wa ri kơl n’hao nuih n’hâm dơn kan, nău gĭt sol êng, nkra êng tâm gưl ủy Đảng. Âk chi bộ hŏ ntik n’hao uĕh nuih n’hâm uănh năl êng săk nơm, gay mpơl kloh nău rlăch ndăng bah mpôl kan Đảng ri bah nê rgop rdâk njêng chi bộ nar lơn ma nâp dăng, kloh uĕh lơn. Đah Đảng ủy xã ri tâm nău kan ma geh ăp ndơ ntĭt leo lor tâm nău kơt nti, ƀư tĭng nuih n’hâm, trong gŭ rêh Hồ Chí Minh ri geh dŭt âk trong ntĭt leo lor đŏng. Ăp ndơ ntĭt leo lor dja ri rgop njêng ăp nău rgâl uĕh tâm lam Đảng bộ bah xã đŏng.”

Ma ăp nău kan ngăn ngăn, na nê̆, trong blău ƀư mhe, nău kơt nti n’hanh ƀư tĭng nuih n’hâm uĕh lŏng, trong gŭ rêh Hồ Chí Minh ta xã Ea Drông hŏ rgop rdâk njêng mpôl kan Đảng kloh uĕh, nâp dăng, mpơl nuih n’hâm n’gâng kan dăch dêh ƀon lan, yor an ƀon lan đŏng. Nkre rdâk tay nău nđơr nsan hao, nuih n’hâm tâm rnglăp n’hanh nău mĭn rdâk njêng ƀon tơm nar lơn ma hun hao srăch uĕh, geh ndrŏng.