VOV4.M’nông - Du mlâm jay mô knŭng lah ntŭk gŭ âm bah ăp nuĭh tâm rnăk wâl ma hôm lah ntŭk ƀư ăp nău ôp kuăl brah yang khlay geh tât nău rêh bah nsum mpôl. Yor rĭ, ăp rnôk ƀư jay, nuĭh Bunong chô tô ta nkual yôk prêh Bunong way ƀư m’ham mŭt jay mhe, đah âk nău ƀư, nău way geh âk nău uĕh rnoi mpôl đêt, geh âk nău khlay uĕh.

Nuĭh tơm jay djôt sah ônh hâng, nông dak răch brah mŭt jay mhe

         Tĭng nĕ, jêh ƀư jay, nuĭh tơm rnăk wâl săch joi mông nar uĕh gay ƀư mŭt jay mhe. Ndơ ƀư dŭt n’hâm dơh, knŭng du mlâm djiăr, du nông dak, 1 rchoăl sah ônh hâng n’hanh du yăng ndrănh. Rnôk mŭt jay mhe, nău bôk năp lah ăp rnăk wâl an ndâk ƀư ăp huêng jay. Huêng jay lah mâng ngâr dơi ntăm ta nklang bôk mpông n’hanh lĕ lah yang Kuắt bah jay mhe ƀư. Jêh rnôk nuĭh tơm jay an nông dak bah năp mpông jay gay dăn yang jay an lăp tâm jay mhe ri ăp nuĭh tĭng bah kơi mbra djôt du nông dak, du đêt grăp ntil n’hanh du rchoăl sah ônh hâng lăp tâm jay mhe. N’hanh lĕ rngôch ăp nuĭh tâm rnăk wâl djôt ndoh ndơ mŭt tâm jay.

         Jêh rnôk ndoh ndơ dơi djôt mŭt tâm jay, nuĭh tơm jay đă nuĭh rnăk wâl ntoh lư, nsing nơm sĭnh ŭnh ntĭt mpơl djôt nău uĕh lăng tât an jay. Nău ôp brah lor rnôk nsĭnh kơt aơ: Gâp dăng brah ŭnh, brah lŭ năk hâng gay njŭr răm an lĕ jay mhe. Dăn ăp brah yang an nău lap, kơl an ăp nuĭh tâm rnăk wâl ngăch dăng uĕh lăng, tâm rnglăp, tâm kơl ndrel”.

         Jêh rnôk ƀư sĭnh, nuĭh tơm jay mbra lăch djăr n’hanh sŏk mham djăr ƀư brah tâm rlŭk tâm ndrănh, m’hing ta n’gâng ngâr n’hanh ăp ndoh ndơ dŏng tâm jay. Nkre mhing nkre răch brah: “Gâp dăn brah yang. Gâp dăn brah lŭ năk, brah mât jay. Gâp dăn gŭn ik gun ngo. Gâp dăng brah dak, brah mpông pêr. Gâp sŏk mham djăr đah ndrănh yăng gay wât ăp ndơ dŏng tâm rnăk wâl n’hanh dăn ăp ntil ndơ dŏng tâm rnglăp uĕh ndrel đah kon sau tâm rnăk wâl. Dăn brah yang kơl an kon sau tâm jay geh n’hâm soan soih dăng lăng ngăch mro mrăng. Ƀư mir geh ba bêng jay, nău rêh hơm răm, uĕh lăng. Jă lĕ brah yang tât ngêt sa đah mpôl hên, ngêt ndrănh yăng, sa piăng poăch djăr n’hanh hên... Ơ yang”.

Ƀư brah mŭt jay mhe geh nkô̆ nău ntĭm nti ăp nău khlay pah kan jan sa, nău khlay tâm wât tâm rŏng oh nô, băl mpôl

         Jêh ƀư brah, bu ranh ƀon djôt tong ndrănh an nuĭh tơm rnăk wâl ngêt lor, jêh nĕ nuĭh tơm rnăk wâl rĕ bu ranh ƀon n’hanh kon sau tâm rnăk wâl ngêt lor. Ăp nuĭh bu ranh mbra nkoch an kon sau djăt nkô̆ nău bah nău m’ham lăp jay mhe n’hanh ăp nuĭh mprơ uĕh mbra mprơ rhơn jay mhe an nuĭh tơm jay.

         Wa Điểu M’rưng ta ƀon Dak Rmoăn, xă Dak Rmoăn, nkuăl têh Gia Nghĩa an gĭt:

“Nău way ƀư brah lăp jay mhe bah nuĭh Bunong rlău ma nău mbah rhơn rnăk wâl, rnoi mpôl ngăch dăng, ƀư sa săk geh hôm geh nkô̆ nău ntĭm nti ăp nuĭh gĭt wât ăp nău khlay bah pah kan jan sa, nău khlay tâm mât, tâm rong băl mpôl, oh nô, nsum mpôl. Ƀư brah lăp jay mhe bah nuĭh Bunong mô knŭng lĕ rnăk wâl ma hôm geh n’ăp bu năch, nuĭh bên ta ăp ƀon lan kiău ma. Kônh wa tât ta aơ ngêt ndrănh yăng, nkoch bri nkoch ka, rsaih ăp nău mô uĕh ŏk r’ah, mbah rhơn ăp nău uĕh lăng, săk soan ngăch dăng, mir ba săk geh, ƀon lan hun hao”.

Nuĭh rblang: Y Sưng Phê Ja