VOV4.M'nông:  Lôch ƀư tâm nđăp gay mpơl nuih n'hâm nkah gĭt, nsĭt n'glĭng tay n'hâm suan pêt mât bah me bơ̆, krêp dêh nău tâm rŏng oh nô, băl mpôl, nkre  ntĭnh kon ndăm sĭt tĭng jay ur, ƀon lan Jarai way ƀư  nău way njot lâk Joă H’Bâu.

Tĭng nău way bah nuĭh Jrai, lôch rnôk ƀư tâm nđăp, bu klô way ndăn ndrăp ndơ jay sĭt jay ur. Lôch rnôk ƀư tâm nđăp 3-7 nar, nuĭh Jarai way ƀư njot lâk njot chot lễ Joă H’Bâu.

Nău way dja geh nkô̆ hôr mpơl nuih n'hâm nkah gĭt, nsĭt n'glĭng tay n'hâm suan pêt mât bah me bơ̆, krêp dêh nău tâm rŏng oh nô, băl mpôl jŏ jong. Nkre, aơ lah nău kan ntĭnh ntăn kon ndăm sĭt ntŭk gŭ mhe, krêp dêh du bông nău rêh đah ur kon. Jêng, gay mpơl nău way bah he, ur sai rlung ân sơch du nar tâm pơh, way lah nar chrai gay sĭt tay jay me bơ̆ nơm, jă oh nô, băl mpôl tât râng lễ Joă H’Bâu.

Nô Kpă Vũ (buôn Toan, xã Ia Kdăm, nkuâl Ia Pa, n'gor Gia Lai) nkoch: "Gâp mhe nđăp ur ta buôn Chư Băh (xã Chư Băh, thị xã Ayun Pa). Lôch ƀư tâm nđăp, gay nkah gĭt n'hâm suan me bơ̆ hŏ pêt mât, mpơl nău di bah he n'hanh tâm ntĭnh oh nô, băl mpôl lor rnôk sĭt ngăn jay ur, gâp ƀư lễ Joă H’Bâu đŏng".

Nău way, tâm lễ Joă H’Bâu, bu klô mbra pư ndrănh yăng, gŭch du mblâm sŭr, 1 glah piăng an me bơ̆; 1 yăng ndrănh, 1 mblâm djăr, 1 blah mbêl an băl mpôl. Ăp ndơ dja bu klô ân nsĭt bah jay ur tât. Ntŭk ƀư nău way njok lâk lah ta jay me bơ̆ bu klô, nuĭh tơm ƀư ntĭnh ntăn way lah nuĭh tơm ƀư ndranh ur sai mom. Lôch ndjôt ăp puăch ndrănh tât jay me bơ̆, bu klô mbra jă lĕ rngôch oh nô, băl mpôl, ndŭl deh keh na dêh bên tât rhơn nsum đah rnăk wâl mhe.

Tâm rơh lễ, ăp nuĭh tâm rnăk wâl, oh nô, băl mpôl, ndŭl deh keh na mbra gŭ rgum nsum tay. Lôch nê, bu klô mbra dâk lah bar pe tong nău, nkoch nkô̆ ƀư lễ Joă H’Bâu, nkre mpơl nuih n'hâm nkah gĭt đah me bơ̆ hŏ pêt mât. Tâm rnôk dja đŏng, oh nô, băl mpôl, ndŭl deh keh na mbra tâm jă tiăm ndrănh yăng gay nkah tay, nkoch bri lô ka, ntĭnh ntăn ur sai mom ăp nău kan tâm let năp tay n'hanh mbah rhơn an ur sai mom tâm pêt tâm mât tât khĭt săk păk mbra, lơi tâm lah tâm janh, nsrôih pah kan jan sa, ntĭm nti oh kon mon său...

Nău way ƀư Joă H’Bâu way ƀư jê̆ lơn đêt roh huach ndơ. Ăp nuĭh râng tâm rnôk dja lơn âk lah nuĭh tâm rnăk wâl nơm, oh nô, băl mpôl, ndŭl deh keh na jêng mpeh roh huach n'hanh mông nar mô ir âk, mbra ƀư bah ôi n'hanh kêng măng, uănh tĭng nău mha êng nău kan bah ăp rnăk.

Aƀaơ, lơn âk ur sai mom ƀư tâm nđăp tĭng trong mhe jêng ta du đêt nkual, nău way dja đêt dơi ƀư lơn rđĭl đah ntơm nơh. Yơn đah nuĭh Jarai, lễ Joă H’Bâu hôm lah du gâl mô dơi lah mô geh tâm nău rêh văn hóa, nuih n'hâm, mpơl nău uĕh êng tâm nău gŭ rêh ăp nar bah kônh wa./.

Nuĭh rblang: Điểu Thân