Wa Lê Phúc, Groi Giám đốc Ntŭk uănh nđôi kop ji n’gor Dak Lak an gĭt, ăp khay bôk năm 2023, ƀư tĭng bôk nău kan chuh pơk hvi ta n’gor mâp âk jêr jŏt yor nău mô tŏng vaccine gay chuh an kon se, lơn lah geh du đêt ntil vaccine mô tŏng jŏ jong ƀư hang rbăn kon se mô dơi chŏl nău kop srê. Tâm rnoh 12 ntil/rmôt ntil vaccine tâm bôk nău kan chuh pơk hvi an kon se tâm năm 2023 Dak Lak mhe tŏng geh 2 ntil vaccine bại liệt n’hanh uốn ván, 2 ntil vaccine lah “5 tâm 1” n’hanh DPT (bạch hầu-ho ga-uốn ván) le lĕ, rnoh hôm ƀa ƀă knŭng tŏng chuh an kon se tât lĕ khay 8.

Tĭng wa Lê Phúc, Groi Giám đốc Ntŭk kan uănh nđôi kop ji n’gor Dak Lak, nău mô tŏng vaccine tâm khay jŏ jong dơi ƀư roh chŏl nău kop srê ntŭk gŭ rêh. Gay mkra nău mô tŏng vaccine, Ntŭk kan uănh nđôi kop ji n’gor lĕ rgum ăp nău ŭch vaccine n’hanh trong nchrăp pă manh vaccine bah năm 2023 n’hanh 2024 gay tâm ôp tâm nchră an N’gâng kan dak si mbơh an Ủy ban nhân dân n’gor pă prăk gay rwăt.