VOV4.M’nông: Bộ Nông nghiệp n'hanh Phát triển nông thôn mhe geh si ƀŭt njuăl Uỷ ban nhân dân ăp n'gor/nkual ƀon têh mpeh Trung ương mpeh nău rđău đă n'hao mât rong, tui ka âk ăp khay kêng dŭt năm 2021. 6 khay bôk năm 2021, lĕ rngôch geh tui ka nklăp 4,1 rkeh tấn, hao 3% rđĭl đah ndrel khay dja năm e nơh; rnoh khlay tăch n'gluh tui ka geh tât 4,1 rmen đôlar, hao 13,6% rđĭl đah ndrel khay dja năm e nơh. Ăp khay kêng dŭt năm aơ, mât rong, tui ka tâm rdâng tay đah âk jêr jŏt, ntul rlong: ntơm tâm khay mih phŭt sial, trôk nar tât ndal, geh ma nău ntoh luh nuh srê; lơn lah ăp nău tât krit nji n'hanh klach rvê bah nuh srê Covid-19 ntưp rêng ƀư jêng geh ma nău pă gâl ăp rêng kan n'hanh pă an geh tăch ndơ mât rong, tui ka. Bộ Nông nghiệp n'hanh Phát triển nông thôn dăn đă Ủy ban nhân dân ăp n'gor/nkual ƀon têh mpeh Trung ương rgum mât uĕh geh tŏng ndơ kan, săk uĕh jêng ntil, ndơ siăm bor, lơh uĕh ntŭk gŭ rêh; ntŭk mât rong, tui ka tŏng geh gay mât rơ̆ jêng di rnoh tât ndơ̆ luh./.

Nuĭh rblang: Điểu Thân