VOV4.M’nông- Ta Hà Nội mhe geh ƀư bôk nău kan tâm nđur  nghệ thuật “Sao độc lập” 2022 di rơh kahgĭt 77 năm cách mạng khay 8 n’hanh Quốc khánh nar 2-9 lĕ geh mbơh nău ryơk rnê ngih dak, mpôl rnoi ndrel đah ăp nău khlăy hôm e mbro, nău mô dơi roh bâh du mpôl rnoi têh dăng: Bôk nău kan geh pă jêng 2 nkô̆ nău tơm, du gâl geh ntơ “Việt Nam- mpôl rnoi têh dăng, nklơi săk mham an neh dak đăp mpăn” n’hanh nkô̆ 2 lah “Việt Nam - nău ŭch rŏng bâh đăp mpăn n’hanh hun hao”. Rnâng kan leo kan lĕ geh mbơh tơih ăp phóng sự đah bôk nău “neh dak bâh ăp nuĭh têh dăng” n’hanh “Ăp nuĭh têh dăng bâh rơh mhe”, đah âk rup nkoch khlăy nkah mbơh ăp rơh têh dăng, ăp rup phim nkoch nău rêh mhe, nău kan mhe bâh neh dak ta rơh đăp mpăn. Ngăn lah, tâm rnôk geh ƀư bôk nău kan “Sao độc lập” năm aơ, rnâng kan leo kan pă an 20 nklâm ndơ lah sổ mpêt nkrem n’hanh ăp kao si ueh ntơr tât ăp nuĭh tă kan cách mạng, ăp nuĭh mê̆ Việt Nam anh hùng, ăp mpôl tahen, ăp tahen sôt rmanh, tahen tă tâm lơh bâh ăp rơh tâm lơh tâm su. Ăp nklâm ndơ đah prăk măt rnoh khlăy 10 rkeh prăk bâh rnoh prăk ntŭk rêh jêng tâm rgop an.

Âk nău kan geh ƀư kahgĭt 77 năm nar Quốc khánh ta trong hăn jâng Nguyễn Huệ

Wa Võ Trọng Nam, groi Giám đốc ntŭk kan văn hóa- thể thao nkuăl ƀon têh Hồ Chí Minh an gĭt , năm aơ nkuăl ƀon têh geh nău nchrăp leo ƀư “Tết độc lập” kahĭt 77 năm Cách mạng khay 8 n’hanh Quốc khánh dak Cộng hòa xã hội chủ nghĩa Việt Nam. 77 năm Sài Gòn geh nău dơi đah âk nău kan hăn ndrel. Êng tâm nar 2/9, nkuăl ƀon têh geh âk nău kan: dŏng khinh khí cầu n’hao cờ ngih dak ta kơh dak me Sài Gòn, dù mpăr, thể thao ta dak me, nkre lah tâm rlong thể thao, njroh mprơ. Ngăn lah bôk nău kan nghệ thuật ta măng ta trong hăn jâng Nguyễn Huệ kơl an âk nuĭh ƀon lan. Tĭng nău mbơh bâh wa Võ Trọng Nam, di rơh Quốc khánh năm aơ lah du năm nkuăl ƀon têh rlet rlău nuh srê, nkuăl ƀon têh mô geh pănh pháo kao kơt ăp năm ma an ntêm ta rơh êng. lĕ rngôch rgum mât kơl nău rêh an ƀon lan an geh âk lơn.

Vơt rhơn kahgĭt 77 năm nar Quốc Khánh 2/9 n’hanh mpŏng tât kahgĭt 190 năm njêng n’gor An Giang, nkuăl Tri Tôn ƀư rơh lễ hội khinh khí cầu Tri Tôn năm 2022 n’hanh  dù mpăr, klêng geh máy, mô geh máy, ndrel đah lễ hội tâm rlong ndrôk Bảy yôk...đah bôk nău: “Mpăr ta nklang rơh lễ hội”. Aơ lah nău tâm nđur khinh khí cầu rơh bôk năp geh ƀư ta miền Tây Nam bộ. lễ hội rgum bơi tât 20 khinh khí cầu ăp ntil. Tâm nĕ, geh 14 khinh khí cầu gâl 1 mpăr yông ta nău prêh bơi tât 20-40 mét geh ƀư nâp n’hanh 3 khinh khí cầu gâl 7, 2 khinh khí cầu mpăr rdeng năch tât uănh nău ueh tôk yang nkual neh Tri Tôn đah nău prêh rlău 50m...Ngăn lah, ôi aơ 2/9, rgum geh rlău 600 nuĭh, geh nđâp: Cán bộ, viên chức, mpôl tahen, ăp nuĭh sư, n’hanh ăp nuĭh ƀon lan, dâk dăp jêng rup bản đồ Việt Nam ta tach tâm rlong ndrôk, nkuăl Tri Tôn, gay ma rhơn rhơn mbah cờ, đah du n’ha cờ ngih dak têh 200 mét vuông n’hao ntô̆ prêh 50 mét ta ka lơ trôk, njêng nău ueh ngăn ta jâng yôk Phụng Hoàng gay ma vơt rhơn nar Quốc khánh 2/9. Rlău ma nĕ, lễ hội aơ geh ƀư măng Kao n’hanh ăp nău njroh mprơ, nău pah kan, ăp ndrơng ndơ sông sa n’hanh leo ƀư pâl rlưn way ơm bâh ƀon lan Khmer gay ma mbơh tơih n’hanh mbơh n’hơ ăp rup ueh Tri Tôn tât đah năch pâl rlưn.