VOV4.M'nông: Radio nău ngơi Việt Nam nar aơ rhơn n'hao êng săk, nkah ndray 77 năm Nar njêng. VOV dah âk năm rlău aơ hŏ ndrel hăn đah nău hun hao ndrel neh dak, n'hao êng săk lah nhih pah kan nkoch trêng nău lư âk ntil ndơ pơk ƀoh, nsĭt tay nău lư tât tĭng jay. Geh du rnoh nuĭh kan rŭ hôch kơl an bôk ƀoh nău ngơi mpăr ngai, lah ăp kỹ thuật viên mô geh du đêt wơi măt, rlău dơi ăp nău jêr jŏt mât nar mpăr ƀoh nău ngơi soih aih, kloh rvah, jru hvi, tâm di ngăn...Nkhêp nkah ndray 77 năm njêng Radio nău ngơi Việt Nam, dăn rong an mông nkoch mbơh tât băl mpôl djăt radio dăch ngai mpeh ăp kỹ thuật viên đah nău kan rŭ hôch, mât an trong pơk ƀoh nău ngơi tât lam ăp ntŭk.

Bah chông yôk prêh tâl bar n'gor mpeh yôk yang bôk tơm neh dak Hà Giang - Chiêu Lầu Thi. Tĭng nău Dao jêng lah sĭn dăp tŭk yor ŭch hao tât muh yôk ân hăn rlău 9 gâl trong nkuăch nkue...Ndrĭ ma năm 2020 du Ntŭk rgum pơk ƀoh nău ngơi neh dak hŏ nâp rdjhân hon kalơ chông yôk prêh chŏnh trôk nê. Gŭ mât njrăng ta aơ dơn geh 2 hê kỹ thuật viên, khân păng hăn tât bah radio pơk ƀoh nău ngơi VN1, CK2 ta Hà Nội ăp khay tâm pleh du tơ̆ hăn mât njrăng pơk ƀoh. Ta n'gâng pơk ƀoh nău ngơi dja, ngai tơm dak oh nô ân mpêt ndrôm tĭng ntruh dak mih gay dŏng wăr năm. Yơn rlơ̆ tay ta aơ hôm l'ĭt mbĕ đŏng. Kỹ thuật viên Cao Hoàng Tiến nkoch: “Nar mih tâm ban kơt nar prăng, lah pih kho ao ri ih lĕ ma pơh mô dơi sơh lĕ dak ơm, ma dak mpêt kơt nê̆ jêng djăt ma tơh, tâl tâm vali gay tât lĕ khay lĕ nar pleh sĭt jay... ur săm pih dơm”.

Gŭ ngai ntŭk ƀon lan, gay geh phe piăng sa, ăp nô kâp nar chợ, tĭng kơt ƀon lan jŭr yôk rvăt n'hanh mbăk anh sa lĕ ma pơh. Ta nkual yôk prêh geh rơh mih lĕ ma khay, oh nô mô dơi jŭr chợ pha lah sa mì tôm an rlău nar dơm. Phŭt mbrô 3 mhe hăn rlău aơ an tay tâm nuih n'hâm oh nô nău nkah krit jêr, ta rnoh prêh rlău 2.000m rđĭl đah măt dak lêng, sial hut hut khôm, tâm ban ma ntô̆ plôk lĕ chor jay, n'glaih chong tâm rep mbro...gŭ trôm jay mât dŏng may ma klach n'glaih chong khuch máy dơm.

Nău kan bah ăp nô lah ăp nar tâm ban kơt ăp nar dơm, dâk bah 4 mông ôi pơk máy ƀoh mbrô VOV1 n'hanh mbrô VOV4 ăp ntil nău ngơi rhŏ dŏng an ƀon lan rnoi mpôl đê̆ rhŏ dŏng an ăp n'gor Hà Giang, Tuyên Quang, Yên Bái, Cao Bằng... Khân păng gĭt lah, trong ƀoh nău ngơi bah Radio mô dơi an tăch gay kônh wa dơi djăt ăp nău lư bah Hà Nội, ăp trong wăng sa, rdâk njêng nău rêh rnăk wâl... ăp kỹ thuật viên n'hanh âk công nhân êng ƀa ƀă geh kon mbiach da dê... nkhêp geh rnôk dja Radio pơk âk nău nchih nkoch mpeh nar khai giảng ƀư ăp nô...gŭ dâk mô đăp. Lah aƀaơ ma gŭ ta jay, nklăp khân păng leo oh kon hăn rvăt năp si ƀŭt si tra, kho ao mhe an năm nti mhe...hôm gŭ ta aơ ăp nô dơn gĭt kuăl điện sĭt đă oh kon nsrôih dơm.

Ta Radio pơk mbrô ƀoh Nam Trung bộ ƀư ta nkuâl Thuận Nam n'gor Ninh Thuận ri duh r'al lĕ ma nar măng, duh r'ôl lĕ ma khay. Radio pơk mbrô ƀoh nkual Nam Trung bộ dơi Radio nău ngơi Việt Nam n'glăp dŏng năm 2021. Nău kan tơm bah Radio lah pơk ƀoh nău ngơi nkrum lam nkual dak lêng Biển Đông n'hanh bar ndru gôl dak Hoàng Sa n'hanh Trường Sa bah neh dak. Tâm nô nău biên chế mô hao jêng gưl bah lơ hŏ ƀư tâm rgâl pleh kỹ thuật viên bah ăp radio pơk mbrô ƀoh nkual miền Trung n'hanh Nam bộ tât pah kan. Nô Quảng ntĭnh ur kon n'hanh oh yuh Radio pơk mbrô ƀoh An Hải, Đà Nẵng – ntŭk nô hŏ krêp dêh rlău bar jât năm nô lăp ta aơ pah kan...nô Quảng an gĭt:  “Jay gâp geh bar hê kon dôl hăn nti, dôl (nti jrô 11 n'hanh jrô 8) dŭt ŭch geh bơ̆, yơn yor nău kan,  yor ma mbrô pơk ƀoh nău ngơi gâp mô kă rnam gŭ ngai jay lăp ta aơ gay pah kan...”.

Nar bôk năp tât Radio pơk mbrô ƀoh Nam Trung bộ nô mô bah rhih rhâl yor n'gâng dơi rdâk ƀư ta gôl choih ngai đah nklang nkuâl Thuận Nam tât 30 cây số, rnôk ăp tơ̆ luh bah dih uănh máy, rse, n'gâng lah mâp choih raka duh dô lĕ ma mpang jâng. Êng đah Chiêu Lầu Thi, ta Thuận Nam 4 khay rmeh ir nar duh, kho ao ta aơ lôch pih ih bar pe mnĭt hŏ sơh hôm...yơn lôch bar pe khay kho ao hŏ blak yor dak ntu khoan ta aơ hôm tiăt boh dak lêng. Nô Quảng hŏ pah kan ta Radio nău ngơi Việt Nam jŏ 20 năm. Nô hŏ tă "mât njrăng mbrô pơk ƀoh” ta yôk Bà Nà, Sơn Trà... yor kơt nê̆ nô way gĭt êng nău khlay bah mbrô pơk ƀoh nău ngơi. Quảng nkoch mpeh ăp nău nkah ta rnôk gŭ mât njrăng n'gâng ƀoh nău ngơi ta chông yôk Bà Nà, Sơn Trà (Đà Nẵng) ma tâm ban kơt nkơnh nău dơi âk. Năm 2021, pleh kâp njrăng ta n'gâng pơk ƀoh nău ngơi ta gôl dak Sơn Trà di tâm ăp nar phŭt mbrô 9 ntô̆ lăp tâm Đà Nẵng. du măng rsol sial rvoănh tâm ban kơt ŭch ntô̆ đăt n'gâng ƀoh. Lap lah bar pe jât năm aơ, rlău mô gĭt dah âk tơ̆ phŭt têh jê̆, n'gâng pơk ƀoh nău ngơi ta An Hải, Sơn Trà hôm tât to rho aơ đŏng...”.

Aƀaơ sĭt ta aơ, Radio pơk mbrô ƀoh Nam Trung bộ, ăp nău tă ơm gĭt khlay nê hŏ dơi nô Quảng nkoch đah oh nô, păng lah: "Mpôl hên gĭt n'gâng Radio pơk mbrô ƀoh Nam Trung bộ nkrum lam dak lêng Biển Đông, nkoch nău lư an nuĭh ƀon lan lơh joi ka, an cán bộ tahen ta ndru gôl dak Trường Sa yor kơt nê̆ lơn ma tâm khay mih phŭt ri n'gâng ƀoh lơn ma kloh gay kônh wa n'hanh cán bộ tahen nklang dak lêng, gôl dak geh nău lư mpet tât phŭt sial gay der đăp mpăn. Rnôk ăp tơ̆ oh nô nklang gôl dak, kônh wa ƀon lan lơh joi ka mbơh pơk ƀoh nău ngơi djăt tăng kloh rvah, tâm ban mpôl hên rhơn ngăn yor nău kan rŭ hôch bah he hŏ rgop tâm n'gâng kan hun hao wăng sa rêh jêng kon nuĭh bah neh dak n'hanh mât njrăng dak lêng trôk nar bah neh dak”.

Nar tâm ban kơt măng đŏng, ta ăp muh yôk prêh kalơ tŭk n'glang Mẫu Sơn (Lạng Sơn), Phia Oắc (Cao Bằng), Cổng Trời (Hà Giang); Pha Đin (Lai Châu); Núi Quế (Quảng Nam); Bà Đen (Tây Ninh), ta dor yôk Dak Lak, gôl choih Ninh Thuận mô lah nklang bri lâng dâng sre Cửu Long... ăp kỹ thuật viên mô kă rnam bri srŏ nđĭk tât nting nđăng, măng mih njâr, rnôk duh tâm ban kơt ŭnh n'hâng, rnôk phŭt tâm ban kơt ntô̆ lĕ ma nuĭh n'hanh n'gâng ƀoh, krêp máy gay mbrô ƀoh mpăr prêh, n'gloh ngai bah nkual yôk prêh tât gôl dak, bah nkual  ƀon têh tât nkual ƀon lan jru ngai n'hanh nkrum lam hvi tât âk nkual neh ta lam ntŭr neh./.

Nhà báo Đồng Mạnh Hùng/VOV- Nuĭh rblang: Điểu Thân