VOV4.M’nông-Tâm ban kơt ăp mpôl rnoi êng ta Tây Nguyên, nuĭh Rđe way geh sa ăp ntil biăp bri dơi sa  dŏng sa ăp nar. Tâm nĕ, nkoch tât piăp pai n’ha rnhao đah nău kah bâh poăch n’hanh ƀô kah bâh n’ha rnhao. Aơ lah ndơ sa way ơm n’hanh dŭt khlăy đah nuĭh Rđe.

          Tĭng ăp ntŭk êng êng, nuĭh Rđe geh ntơ biăp pai n’ha rnhaoêng êng, nuĭh rđe ta nkual Adham ntơ lam djam kpŭng yao mô lah djam tê, hôm nuĭh Rđe ta nkual bih ntơ lah djam bai. Tĭng ăp nău ntơ êng êng yơn nău gâm n’hanh ndơ gâm nsum tâm ban dơm. Aduôn Ƀăt H’Lan Niê ta Buôn Kla, xã Dray Sap, nkuăl Krông Ana, n’gor Dak Lak an gĭt, ndơ sa aơ geh bâh kăl e n’hanh ăp ntil ndơ gay ma gâm lĕ geh sŏk bâh tâm jay, tâm mir n’hanh ngăn lah mô dơi mô geh n’ha rnhao kranh, geh mău nđir.

“Bâh ntơm kăl e tât aƀaơ, nuĭh Rđe hôm nha way geh gâm ndơ sa aơ, lĕ rngôch ăp ntil ndơ geh tâm jay kơt lah blân tăng, ƀăng lĕ geh gâm nsum da dê,l geh poăch tĕ poăch, geh ka tĕ ka, hôm lah mô geh rĭ pai biăp dơm. Lah ŭch sa biăp pai he an geh nchrăp n’ha kơt lah djam băl, djam ƀlê mô lah n’ha bum tâm mir, blân tăng, mbrăch, lah geh ƀăng dơi da dê, lĕ rngôch dơi geh pai da dê. N’ha rnhao rĭ mô dơi mô geh, lah mô rĭ rnôk he tăm mbo rĭ sŏk n’ha mbo, mô lah biăp bot ngot dơi đŏng, geh nău ƀô kơt rnhao, nĕ lah nău pai bâh u che kăl e.

Wa H’Lan Niê nkoch, gay ma an biăp pai geh kah, ueh, di kah nuĭh pai an geh gĭt nău gâm. Rnôk ntơm ƀưi âk nuoĭh ndrel ƀư nsum, ăp nuĭh ƀư du nău kan, jŭh rnih, săch biăp, juh boh mbrăch...Nkre ƀư, nkre tâm ngơi, tâm nkoch mpeh nău rêh.

“Bôk năp he an geh ntrăm phe, lôch ntrăm he juh jêng rnih,  juh nkre đah n’ha rnhao lôch nĕ he pai dơm. Tâm rnôk pai, lah gâm đah ƀăng rĭ ƀăng nkret lor, lah ŭch sa đah ƀăng srat rĭ he tĕ ƀăng srat, lah ŭch ƀăng rêh tĕ ƀăng rêh, he gâm gay ma ƀăng bah ir srat lôch nĕ nkhŭt lơi tŏ dak mhe, lah geh play rpoăl, nông rĭ he gâm nsum da dê, poăch mô lah ka nsum lĕ rngôch. Nkhŭt dak rnih pai nsum mpli nsum gâm an lêk, tĕ tay du đê mbrăch lah kah ngăn”.

Biăp pai n’ha rnhao way geh ƀư gâm sa ăp nar n’hanh ta rơh rgum âk nuĭh kơt lah sa rhơn, rgum rnăk vâl mô lah râng khĭt...Rlău ma nĕ, aơ lah ndơ sa geh âk nuĭh rnăk ƀư vơt năch. wa H’ Lan Niê nkoch, gay ma gâm ndơ sa aơ mô geh hoach prăk yơn hôm nha kah đŏng.

“Aƀaơ hăn râng khĭt ta ƀon êng gâp hôm nha geh saơ bu pai biăp đŏng, gâp mĭn lah ndơ sa aơ he mô geh hoach prakw rvăt yơn ndơ sa bâh mpôl rnoi he saơ dŭt kah, he hăn ta bri tôch, aƀaơ tăm ta văr jay lah geh ndơ sa hôm”.

Rnôk sa, piăp pai n’ha rnhao geh ƀô kah. ndơ sa biăp pai n’ha rnhao way geh sa đah piăng mpli nsum dŭt kah ngăn. Nuĭh Rđe ŭch sa yor păng ƀô kah bâh n’ha rnhao n’hanh chĭn bâh poăch, ka, gâm nsum geh nău chĭn kah. Biăp pai n’ha rnhao geh ƀư dơh dơm mô geh jêr yơn nsĭt tay nău ƀô kah dăch bên. Nuĭh lĕ tă tât đah ƀon Rđe mbra mô dơi chuêl nău ƀô kah bâh ndơ sa bri dak rnôk geh sa biăp pai n’ha rnhao aơ.

Nuĭh rblang: Thị Đoắt