Tĭng nău way, ƀư brah lah uĕh an brah yang bah nuĭh Bahnar dơi ƀư tĭng 2 trong, mô lah geh nsum mpôl đah tât râng bah lĕ ƀon mô lah đah nău ƀư jêt an tĭng nuĭh. Wa Đinh Ply ta nkuăl K’Bang, n’gor Gia Lai, an lah nuĭh Bahnar way geh ƀư brah lah uĕh brah yang lĕ nking n’gang an săk nơm ăp nuĭh rnôk khân pơng ntơm ƀư du năm nĕ. Rnôk nău kan lôch jêh ma mô hoach an nuĭh tơm ri nuĭh Bahnar mbra ƀư brah lah uĕh tâm rnăk wâl. Nău ƀư aơ dŭt dơh knŭng kuăl brah lah uĕh đah ndơ nsơr lah ndrănh n’hanh play dô, lah geh poăch djăr, sŭr ri lơ uĕh, yơn mô nchâp. Wa Đinh Ply an gĭt:

 “Kơt nău an hăn ƀư moh ndơ nĕ bah jay tât ntŭk nĕ. Khân pơng lah nuĭh hăn tât ntŭk tât ndrâm, rnôk hăn jêh hăn ri sĭt ƀư brah dăn uĕh an brah yang ta nkual nĕ yor lĕ kơl an mâp nău lap, nău kan lôch uĕh”.

Ăp nuĭh ranh tâm ƀon ƀư brah dăn lah uĕh huêng ba.

Ta ntŭk gŭ rêh nsum mpôl, ƀư brah dăn uĕh an brah yang bah nuĭh Bahnar mbra geh têh hvi lơn đah nău ndrel ty rgop soan drăp ndơ lĕ rngôch ăp nuĭh, ăp jay. Gay nchrăp an nar ƀư, lor bah năp nĕ nklăp du khay, ăp nuĭh tâm ƀon rƀŭn tâm nchră tâm pă nău kan. Ăp nău jâk kơt koaih rwach, nkra jay Nhih kơt ăp nău kan nchrăp ndơ djăr, sŭr, dơi bu klô tâm ƀon ƀư. Bu ur ri ƀư ăp nău kan n’gơch lơn kơt nchrăp ndơ sa, ndơ nsơr ƀư brah yang.

Mpeh nar ƀư, bu ranh ƀon mbra tâm nchră đah ăp rnăk n’hanh ăp nuĭh dơi nsing nơm gay hăn tât tâm ban ŭch nar ƀư. Wa Đinh Ply an gĭt tay:

“Gay ƀư brah dăn uĕh, he an tâm ban ŭch đah kônh wa, ƀon lan, khân pơng jêh tâm nchră mư ƀư rƀŭn ƀon nchrŏng nar nĕ an ƀư. He an dăp nar tâm di n’hanh dơh ngăn an kônh wa ru ngăn ri he sŏk nar nĕ. Yơn lah he an tâm nchrăp nchrăp đah rnăk wâl đah ƀon lan lor ri khân pơng mư dơi uănh nar rnôk nĕ khân pơng mbra gŭ ta jay rgum ndrel ăp nuĭh ăp nău kan”.

          Tâm rnôk rƀŭn tâm nchră, ndơ ƀư brah dơi ăp nuĭh dŭt uănh. Tĭng way ăp năm mbra djăr, sŭr mô lah bê. Yơn lah, lah bah năp nĕ ƀon lan lĕ ƀư brah dăn an uĕh ri jêh đêt khay nchrăp mbra ƀư brah dăn uĕh đah ndơ ƀư khlay ngăn nĕ lah sa rpu. Ndrel đah nĕ, lĕ rngôch ndơ mbra dơi rgop tĭng nău geh bah ăp rnăk. Aơ lah ăp ndơ ơm geh bah ăp rnăk. Rnôk phung bu ranh, ăp rnăk lĕ hăn tât tâm ŭch nar ƀư ri ăp nuĭh tâm pă nău kan, nchrăp ndrănh, poăch... gay tât nar nchrŏng ndrel tât jay Nhih ƀư.

Ƀư dăn lah uĕh dơi nuĭh Bahnar ntơm ƀư tâm khay 12 ăp năm, rnôl ăp nău mir ba lĕ jêh, tuh mbo lĕ dơi prăp tâm jay. Tâm nar ƀư, bu ranh ƀon ndơn măt kuăl brah, jă ăp brah yang tât wăch ngêt sa. Ndơn măt bu ranh, bu ranh ƀon dâk ta n’gul jay Nhih bah năp dông piăng, ntơm kuăl jă ăp brah yang tât wăch ƀư brah. Tĭng Wa Đinh Tinh, ta nkuăl K’Bang, n’gor Gia Lai, ƀư brah dăn lah uĕh an brah yang lah nău lah uĕh brah yang, lah uĕh ăp Yang lĕ nking n’gang mât uănh ƀon lan tâm năm bah năp, lĕ mât njrăng an nuĭh ƀon lan mô kop ji, an ăp nău uĕh lăng, ăp nău m’hĭk janh rlău ngăch:

          “He ƀư brah yang dăn an ƀon lan mô geh nuĭh kop ji. Nuĭh kop ji ri ƀư brah yang da dê gay ngăch bah. Way geh nău khlay tâm rnăk wâl, tâm ƀon ri ƀư brah da dê”.

Ƀư brah dăn lah uĕh an brah yang bah nuĭh Bahnar dơi ƀư ôi ơm, nău ƀư brah jŏ nkhlăp du mông đah tŏng ăp nău ôp kuăl brah yang, njuăl ăp nău dăn uĕh lăng, đăp mpăn n’hanh hơm răm an ƀon lan. Tĭng nău kuăl brah lah chĭng. Yor tĭng nău way bah nuĭh Bahnar, knŭng geh tơm njuh n’hanh nteh chĭng mư dơi jă ăp brah yang. Nĕ lah trong an kon nuĭh tâm boăt đah brah yang, njuăl ăp nău ŭch, nău mpŏng.