VOV4.M’nông: Ƀư brah tŏ mham bri bah nuĭh Mạ ta nkuăl Cát Tiên, n’gor Lâm Đồng, lah du trong ƀư lŏ mir uĕh lăng, geh âk nău khlay di kon nuĭh. Tă bah ƀư brah, nuĭh Mạ mpơl nuih n’hâm nkah gĭt n’hanh ryơk ăp moh ndơ bri lĕ an đah nuih n’hâm wơt dơn n’hanh mât ndrăy.

Rnôk yan mih tât, dak sĭt bêng chrŏ, tơm si chăt nkŭr, lah rnôk nuĭh Mạ ƀư brah bri. Wa Nguyễn Huy Cao, Ngih văn hóa truyền thông n’hanh Thể thao nkuăl Cát Tiên, n’gor Lâm Đồng, an gĭt:

 “Ƀư brah tŏ mham bri geh bah rnôk nuĭh Mạ u che deh n’hanh gŭ ta nĕ. Tâm rnôk rgâl, khân pơng hôm e dơi mât nău khlay. Nĕ lah nău ƀư brah. Tâm nău ƀư brah nĕ an gŭch mpa nsơr an n’hanh tŭr chĭng. Nĕ lah ăp nău khlay ma bu hôm e mât ndrăy an tât nar aơ”.

Ƀư brah tŏ mham bri bah nuĭh Mạ dơi ƀư êng ta jay rnoi mpôl mô lah lĕ ƀon. Ƀư têh lĕ ƀon way tâm năm nĕ geh trôk nar, dak bŭk, duh phang mô lah geh nuĭh khĭt tâm bri. Wa Nguyễn Huy Cao nkoch:

“Tĭng tâm nău geh ndơ, têh jêt. Ntĭt nsa kơt tâm du ntŭk gŭ rêh ƀư ndrel ri bu dơi sa rpu. Lah kơt du rnoi deh sâm geh dơi sa du mlâm rpu, hôm du rnoi jay rot rêh 2-3 bông nuĭh ri khân pơng wa gŭch sŭr, bê yơn ma mpa ƀư brah an geh du mlâm djăr mô lah mpa geh 4 jâng, lah mô dơi nchron pănh ta bri khân pơng sŏk ta jay”.

Bu klô bu ur tâm ƀon tŭr chĭng, nkre njroh ăp nău njroh way ơm

          Jêh ƀư brah tŏ mham bri, ƀon lan Mạ ŭch du nău rêh tŏng ăp, uĕh lăng, đăp mpăn kơt nău rblang bah nô Điểu Các Khu ta ƀon Ngo, nkuăl têh Cát Tiên, nkuăl Cát Tiên, n’gor Lâm Đồng:

          “Ƀư brah aơ gay an ƀon lan he đêt kop ji. He hăn tâm bri, hăn tâm dak, mô geh wăk n’gu chuh jâng, mô geh mâp nău. He lah uĕh brah yôk, brah bri kơl an ƀon lan he mô di kơl an êng he”.

Ƀư brah tŏ mham bri mô knŭng êng lah du nău ƀư geh brah yang ma hôm geh âk nău uĕh bah rnoi nuĭh Mạ. Ăp nău kan an ƀư brah bri dơi ăp rnăk mô lah rnoi mpôl mô lah ƀon lan nchrăp lor bah năp nĕ du khay. Bu ranh ƀon K’Ban ta ƀon Ngo, nkuăl têh Cát Tiên, an gĭt:

“Lĕ rngôch kônh wa, bu ur râng da dê. geh piăng dĭng, piăng m’êt, đah du đêt poăch, ăp ndơ bah he geh an ƀư brah. Ta jay ƀư jêt dơm. ta jâng gung ri ƀư du dông piăng. Lah mô geh ri kônh wa tâm rgop, geh djăr rgop djăr, geh sŭr rgop sŭr. Du jay rgop nsum lah du mlâm rpu mô lah ndrôk”.

Tâm ƀư brah bah nuĭh Mạ, tơm njuh lah ngoăy tâm âk nkô̆ nău dŭt khlay yor lah ntŭk an brah gŭ n’hanh ngêt sa. Hôm tơm njuh, lah hôm e brah gŭ ta nĕ. Tơm njuh dŏng ƀư brah bri bâh nuĭh Mạ geh 2 n’gâng. 1 n’gâng ta n’gul jay, 1 n’gâng rdâk prêh bah dih jâng gung. Tĭng wa Nguyễn Huy Cao, nuĭh Mạ an ƀư 2 n’gâng njuh lah yor:

“Tơm njuh bah nuĭh Tây Nguyên ndơ gay boăt nthoi đah brah yang. Yang mbra hăn tĭng tơm njuh, ta ntung njuh nĕ gay hăn lăp tâm jay. Lah tâm jay, Yang tât gŭ ta nĕ gay ngêt ndrănh n’hanh sa ăp ntil ndơ tâm jay. Hôm tơm njuh bah dih ri way lah rnôk bu ƀư sreh rpu ri bu kăt rpu ta nĕ”.

Nuĭh kuăl brah dăn brah an nău uĕh.

Tơm njuh rdâk sŏng đah măt neh jêh nĕ sŏl chăt gay mô nsoet mô lah nkêng. Jêh nĕ pâng n’gâng kăt rse reh 8 đah geh 4 n’gâng tâm rwăch lĕ dơi vĕ ơm ntĭt mpơl an 8 trong bah trôk. Wa Nguyễn Huy Cao an gĭt:

“Aơ lah mpa tam ngăn bah nuĭh Mạ. Brah tơm njuh gŭ tâm dâng tĭng jrŏng jay, jêh nĕ tât rup ndah ba; jêh nĕ bah lơ lah du mlâm mpăl peh ba, ta ka mpăl lah rnai peh ba. Đah nău uĕh way ơm tuch tăm lŏ mir bah nuĭh Tây Nguyên lah nsum n’hanh nuĭh Mạ lah êng ri pơng hăn ndrel đah nău geh ngăn ngên lah tơm ba, mpăl n’hanh rnai”.

Gay ntơm ƀư brah tŏ mham bri, nuĭh tơm dâk ta bah dih mpông jay wơt năch ngai n’hanh kônh wa tâm ƀon tât wăch. Ndrel đah nuĭh tơm ƀư geh bu ur bu klô tâm ƀon nkre tŭr chĭng, nkre njroh ăp nău njroh way ơm gay wơt rhơn năch tât đah ƀư brah tŏ bri.

Ƀư brah tŏ mham bri bah nuĭh Mạ lah nău uĕh way tĭng lĕ geh bah jŏ, mĭn lah nău tâm rnglăp bah ƀon lan đah bri dak, tâm ryơk n’hanh mât njrăng bri dak. Yor rĭ, nău ƀư brah tŏ bri, rgop kơl nuĭh Mạ n’hao nău wât mât ndrăy nău uĕh way ơm bah rnoi mpôl đêt kơt ƀư uĕh nuĭh n’hâm tâm rnglăp, dăch dêh ntŭk gŭ rêh nsum mpôl.

VOV5/Nuĭh rblang: Y Sưng Phê Ja