Nchrăp tâm rnôk nkah 20 năm ndâk n’gor Dak Nông geh tâm dŭt pơh aơ, rnoh năch tât tâm n’gor aơ mra hao âk ndal.

Wa Lê Thị Trúc Linh, Groi Giám đốc N’gâng kan Văn hoá, Thể thao ndrel Pâl n’aih Dak Nông mbơh, rnôk nkah 20 năm ndâk n’gor, nchrăp rnoh năch hăn pâl n’aih mra hao âk. N’gâng kan ndrel UBND ăp nkuăl ntơm ƀư nau mêt uănh ntŭk gŭư rlu mpeh nau dơi pă dŏng nau kan, nkre đă rgâl, ƀư nâp ăp ntŭk gay ma n’hao nau ueh ân năch gŭ. Tĭng nê, tâm nkuăl ƀon têh Gia Nghĩa ndrel ăp nkuăl êp nê lah Dak Glong, Dak Rlâp, Dak Nsong, Dak Mil, geh bơi tât 200 ntŭk gŭ geh nau dơi tŏng rlau 7.100 năch/nar.

Ndrel ma nê, ăp nkuăl tơm tâm ăp ntrong pâl n’aih, ăp ntŭk pâl n’aih Công viên địa chất lam ntur neh UNESCO Dak Nông kơt Krông Nô, Dak Glong, Cư Jut, ăp ntŭk gŭ n’hao nau nâp mra ân năch gŭ rlu. Rnôk aơ, năch kŏ geh ăp nau ueh tâm nau rêh, nau ơm yau, ndơ ngêt sa bah ăp rnoi mpôl tâm Dak Nông tâm ăp ntŭk pâl n’aih nsum mpôl./.