Ăp nar dŭt năm, rnoi Bahnar tâm ƀon Mơ Hra, xã Kông Lơng Khơng, nkuăl Kbang, n’gor Gia Lai rhơn vơt năch tă bah Hà Nội. Bu năch sa piăng prung, djăr gŭch ndrel ngêt ndrănh yăng, djăt tur chĭng đŏng. Yuh Lê Thị Phương, bu năch tă bah Hà Nội, ngơi:

            ‘Aơ lah rơh bôk năp tât ta Gia Lai, kŏ lah rơh bôk năp gâp geh saơ bu tur chĭng Tây Nguyên. Ndrel ngăn lah geh n’ăp ma kon se jê̆ tur đŏng, ngăn ngên gâp saơ ueh ngăn, du nau ueh m’ak tâm nuih n’hâm, ueh lăng ngăn’.

            Ndrel ma ƀon Mơ Hra, xã Kông Lơng Khơng, nkuăl Kbang, n’gor Gia Lai ndâk ăp nau kan pâl n’aih nsum bah rnoi Bahnar, geh: Kbang, xã Kông Lơng Khơng; Stơr xã Tơ Tung, Kon Bông xã Đăk Rong ndrel Chiêng, nkuăl têh Kbang. Bu ranh Đinh Mưh, ƀon Mơ Hra, xã Kông Lơng Khơng, mbơh:

            ‘Phung hên nchrăp homestay lah ngih jong gay ân năch bĭch, rnăk hên mra n’gon piăng tĭng nau vay bah rnoi nơm, phe ba mir, nhŭp ka tâm dak, ndrăng yăng ân năch ngêt, jêh ri njroh mprơ lah bu ŭch ngăn. Bu năch tât ri ntŭk ŭch bĭch kŏ dơi đŏng. Gâp lah bu ranh ƀon, gâp geh nau dơi ndrel ma kônh wa nơm ƀư ndrel nsôih ƀư ân ueh”.

            Yuh Trần Thị Bích Ngọc, công chức UBND xã Kông lơng Khơng, nkuăl Kbang, mbơh, nau kan mât nau ơm tă bah ntŭk gŭ ân tât nau vay ơm geh uănh khlay gay kônh wa ƀư pâl n’aih nâp nâl:

            ‘Bah nau ƀư pâl n’aih ri ăp ntil ndơ ơm ri kŏ geh kônh wa ndâk ƀư kơt lah tur chĭng, tanh dông, tanh sah, tanh njuh. Kônh wa nsôih nkre đăp mpăn mât ân ueh nau khlay ơm ndrel kŏ nkre hun hao nau kan pâl n’aih gay rgum geh bu năch tât. Bah nê ri rgop nau ƀư geh tay nau văng sa ân kônh wa tâm ƀon”.

            Mô êng ăp ƀon pâl n’aih, ma ăp xã geh âk nŭih rnoi mpôl đê̆, nau kan mât nau ơm rƀŏng tât ƀư pâl n’aih kŏ geh ƀư đŏng. Wa Trần Xuân Nam, Kruanh UBND xã Lơ Ku, nkuăl Kbang, mbơh:

            “Ăp ƀon geh nau nchrăp mât nau ơm yau bah rnoi Bahnar. Êp nê hên mra ƀư pơk rêng hvi du đê̆ nau ueh ơm bah rnoi mpôl đê̆ mpeh Bắc kơt nŭih Mông, Tày gay ma ƀư ueh lơn tay nau ơm yau tâm nkuăl. Ngăn lah tâm rnôk Tết, xã ƀư nau rgum năm mhe, rgum ăp ƀon rnoi Bahnar hăn tur chĭng, Ndri ma, du đê̆ ƀon bah nkuăl hŏ geh nau blau gay ma mât ân ueh nau ơm bah nơm”.

            Ntơm năm 2022, nkuăl Kbang ntuh kơl 4 rmen prăk gay ƀư Bôk nau kan mât ndrel hun hao nau ueh ơm bah ăp rnoi mpôl đê̆ ndrel ma nau ƀư hun hao pâl n’aih lvang năm 2021-2025. Wa Đinh Đình Chi, Kruanh jrâu kan Văn hoá nkoch nau nkuăl Kbang, mbơh, nkuăl kŏ tâm rgop ƀư âk ntŭk gay kơl an ƀon lan mât nau ơm, njêng nau geh dơi đăp mpăn nau rêh:

            ‘Tal bôk năp lah ntuh kơl gung trong ngih vâl, tal bar lah mât ndrel ƀư ueh dơi ăp nau khlay ơm bah ăp ntil ndơ ơm yau bah ƀon lan tâm nkuăl nthoi đah ăp nkuăl nsum njêng luh du nau kan trong ƀư gay ma leo bu năch tât. Ndrel rnôk bu năch tât ri nơm rgum ƀon lan bôk năp geh nau blau mât nau nchrăp, njêng nau rêh; bôk năp sŏk ndơ ơm yau gay ma ƀư tơm gay hun hao pâl n’aih ndrel kŏ sŏk nau pâl n’aih gay rong ăp nau ơm nê ndrel pă nau kan pah, geh prăk ân ƀon lan”./.