VOV4.M’nông -  Ôi 8/4, ta ngih tâm rlong Thể dục thể thao n’gor Dak Lak, nkual ƀon têh Buôn Ma Thuột, N’gâng kan văn hóa, Thể thao n’hanh Pâl nđaih n’gor tâm rgop đah Ban Dân tộc n’gor ƀư “Ntơm rgum tâm rlong Thể thao ăp rnoi mpôl đêt Dak Lak rơh tal 18 năm 2022”. Giải mbra ƀư bah nar 8/4 tât nar 10/4/2022.

Ntoh măt kruanh UBND n’gor Dak Lak an cờ nkah gĭt an ăp rmôt

Rlău 600 nuĭh tât bah 15 rmôt bah ăp nkuăl, nkaul têh n’hanh nkual ƀon têh Buôn Ma Thuột, râng tâm rlong ta 7 môn geh: Pah play (bu klô, bu ur), chưng play mini bu klô, nchoăt ngai (bu ur, bu klô), hăn yơt yơng (bu klô, bu ur), pănh na (bu klô, bu ur), ntrôl mâng (bu klô, bu ur) n’hanh dô̆t rse. Aơ lah ăp môn thể thao way ơm, way dơi ƀư tâm ăp rơh lễ, hội ta ntŭk. Rgum tâm rlong thể thao ăp rnoi mpôl đêt n’gor lah giải thể thao way ơm dơi ƀư ăp năm, yơn lah yor srê Covid-19 geh jêr jŏt, rgum tâm rlong năm 2021 geh tăch proăt jêng tât năm aơ.

Ăp nuĭh râng tâm rlong ta nkô̆ nău nchoăt trong ngai

Ăp nuĭh râng tâm long lah nuĭh rnoi mpôl đêt dôl gŭ rêh n’hanh pah kan ta Dak Lak. Tă bah rgum tâm rlong, ndrel đah hun hao pơk hvi tiăr nti tâm rlong thể dục thể thao, n’hao ngăch săk soan, nuih n’hâm an nuĭh ƀon lan; joi mât ndrăy  n’hanh mât uĕh ăp nău khlay văn hóa way ơm, tâm rnglăp rhăt jăp tâm ntŭk gŭ rêh ăp rnoi mpôl ta n’gor.

Nuĭh rblang: Y Sưng Phê Ja