Kêng măng 25/11, ta Bảo tàng Thế giới cà phê, nkual ƀon têh Buôn Ma Thuột, n'gor Dak Lak, hŏ rdâk ƀư tay nău way ôp brah rhơn khay kăch rek n'hanh rup gui nkoch ndrong Dam San.

Tâm khuh n'gôr nău nteh chĭng gong, bu ranh ƀon Ama H'Loan (ta buôn Akô Dhông, nkual ƀon têh Buôn Ma Thuột) ƀư tơm răch brah rhơn khay kăch rek mbơh đah brah yang n'hanh năch drôn mpeh nău dơi geh tuch tăm tâm năm rlău aơ.

Nơm geh mih lăng prăng uĕh, ndơ tuch tăm hao jêng nđĭr uĕh, luh play lay mbôn jêng kăch rek nsĭt geh âk. Ba bêng sah bêng drŏng, cà phê bêng jay. Aƀaơ mbo ba hŏ kăch rek lôch jêh, nuĭh tơm rnăk ƀư ôp brah nkah gĭt brah yang, trôk nar n'hanh ndrel rhơn đah ăp nuĭh. Bu ranh ƀon Ama H'Loan an gĭt, lễ rhơn kăk rek mbo ba hŏ geh bah ơm tâm nău kan tuch tăm mir ba bah nuĭh Rđe.

Aƀaơ, nuĭh Rđe hŏ rgâl jêng tăm âk ntil tơm tăm jong nar êng ƀa ƀă kơt cà phê, tiêu. Bol ma kơt nê̆, nău way nsĭt ba n'hao rhe hôm geh rnoh khlay kơt ơm đŏng. Tâm trôm bôk nău kan, năch pâl nđaih hôm dơi djăt uănh rup gui ot ndrong Dam San n'hanh joi gĭt mpeh nău way ơm văn hóa cà phê bah âk dak lam ntŭr neh đŏng. Aơ lah du nău kan rƀŏng tât Lễ hội cà phê Buôn Ma Thuột năm 2023 nchrăp ƀư tâm khay 3 năm tât ta Dak Lak.

VOV Tây Nguyên/Nuĭh rblang: Điểu Thân