VOV4.M’nông: Kêng măng 27/5, ta nkuăl ƀon têh Buôn Ma Thuột, Bảo tàng lịch sử neh dak tâm rgop nsum đah Bảo tàng Dak Lak ƀư rơh rƀŭn mbơh nau tă geh bah rnôk hăn koi ndơ ơm yau Thác Hai tal bar. Ntŭk ndơ ơm yau geh joi Thác Hai tâm thôn 6, xã Ia Jlơi, nkuăl Ea Súp, n’gor Dak Lak. Ntŭk aơ geh saơ tâm bôk năm 2020 ndrel ƀư geh joi tal bôk năp tâm khay 3 năm 2021. Tâm rơh hăn joi rơh tal 1 geh ƀư ntơm dŭt năm 2021 tât aơ, ăp nŭih ƀư hăn mêt uănh joi hŏ rgum geh âk ngăn ntil ndơ ơm ơm kơt lah:

Sung ƀon lŭ, ndơ mon ma uk, ndơ ƀư ma thuỷ tinh, môch lŭ, rlau 1000 mâng nsôch lŭ ndrel ăp rmưn ntil ndơ geh tik jê̆ jê̆. Tĭng ăp nŭih uănh joi, năl, ntŭk ndơ ơm geh joi Thác Hai lah ntŭk ndơ geh ăp ntil, nkre lah ntŭk gŭ, nkre lah ntŭk môch tâp nŭih khĭt, lŏ lah ntŭk ƀư nau kan ê nkra ăp nsôch lŭ têh. Ntŭk uănh năl aơ geh nau jŏ ntơm bah rnôk nê tât rnôk aơ nklăp 3.500 năm tât 2000 năm bah năp nê ndrel geh nau hôm kơn jŏ jong nklăp 1000 năm đŏng./.

Nŭih rblang: H’Thi