Rlău 10 khay bah năm 2022, năch pâl nđaih tât n’gor Dak Lak bơi êp tât 1 rkeh nuĭh, nsĭt geh bah pâl nđaih lĕ rlău trong nchrăp lĕ năm, tâm nĕ nklăp 12% lah năch dak bah dih. Dĭng lĕ nsĭt geh bah pâl nđaih geh 824 rmen prăk, rlău 50 rmen prăk nkôp đah trong nchrăp bah năm 2022. Năch pâl nđaih Dak Lak lĕ ngăch rdâk nkra jêh srê covid-19 dơi uănh nđôi. Trong rƀŏng nsum bah năch pâl nđaih săch ăp ntŭk pâl nđaih mhe, geh âk nău ƀư mha, jêng săch ăp ntŭk tât ta Dak Lak.

N’gor Dak Lak nsrôih kơl nău kan cheh tanh an hun hao pâl nđaih

Wa Nguyễn Thụy Phương Hiếu-Groi kruanh n’gâng kan Văn hóa Thể thao n’hanh pâl nđaih n’gor Dak Lak an gĭt, n’gor dôl geh ăp trong mkra ntop kơl ăp rmôt kan, êng nuĭh hun hao pâl nđaih, tâm nĕ uănh khlay hun hao pâl nđaih sinh thái ntŭk gŭ rêh hăn ndrel đah mât ndrăy văn hóa ăp rnoi mpôl. Tâm lvang 2021-2025, n’gor lĕ săch ntuh kơl têh an 5 ƀon bah nuĭh rnoi mpôl đêt, đah rnoh prăk kơl bah 800-1 rmen prăk gay hun hao pâl nđaih:

“Nghị quyết 08 bah HĐND n’gor Dak Lak bah năm 2021-2025, tâm 4 năm nĕ he mbra ntop kơl 5 ƀon hun hao pâl nđaih ntŭk gŭ rêh. Hôm tâm bôk nău kan ntop kơl tĭng nghị quyết 08 bah Quốc hội mpeh ntop kơl ƀon lan rnoi mpôl đêt tâm lvang aơ geh bôk nău kan mrô 06 n’hanh dơi n’gor geh ntop kơl 2 ƀon Ako Dhong n’hanh Tâng Jú, n’hanh trong nchrăp aơ n’gâng kan lĕ pah kan đah ăp ƀon gay ƀư tĭng hun pâl nđaih văn hóa ntŭk gŭ rêh”.