VOV4.M’nông: Tâm âk năm dăch aơ ta âk ƀon rnoi mpôl đêt ta n’gor Kon Tum ntoh âk ban nhạc ma druh ndăm râng dŭt âk lah kon se. Nău uĕh ngăn bah ăp ban nhạc aơ lah ăp băl mom mĭn joi, njroh mprơ âm nhạc way ơm bah rnoi nơm đah nuih n’hâm dŭt nđơr, ŭch êng. N’hêl na nê̆ an saơ nău ƀư bah ăp ban nhạc mom lĕ rêng nău ŭch âm nhạc n’hanh rgop mât rƀăy, ƀư uĕh nău khlay âm nhạc way ơm tâm nău rêh ăp nar bah nuĭh ƀon lan.

Ôi nar prao ăp pơh, ban nhạc bah 15 băl mom, rnoi Ba Nar, mpeh Rơ Ngao ta ƀon Đăk Yo, xă Hơ Moong, nkuăl Sa Thầy lŏ rgum nti. Lĕ rngôch ăp nuĭh tâm ban nhạc dŏng blău đinh pút, blău gŏ chĭng, gông lŭ, tơ rưng, gâr n’hanh ndơ gŏ tĭng nău mprơ:

“Mpôl oh nti êng bơi 2 năm. Mpôl oh nti ri dŭt gơih, dŭt răm. Gŏ đơn tơ rưng pơng nteh êng, gông lŭ pơng nteh kơt dak leng. Yor nău ŭch mpôl oh tĭng ndơ uh, gŏ aơ răm ngăn”.

Ban nhạc ƀon Đăk Y n’glŏ nteh tâm rnglăp nău way ơm bah nuĭh Bahnar mpôl mpeh Rơ Ngao.

Nuĭh tơm rmôt ban nhạc mon ƀon Đăk Yo A Chiêng, 21 năm deh, an gĭt tâm rnôk ndâk njêng ban nhạc tă aơ bơi 3 năm mâp dŭt âk jêr jŏt. Dơi joi nuĭh blău đah âm nhạc lĕ jêr, bônh jă ăp băl nĕ râng dŭt njê đŏng. Nuĭh ri hôm e hăn nti, nuĭh lŏ mô ru đah mir ba hôm geh n’ăp nău prêng. Ndrĭ yơn knơm nău ŭch âm nhạc way ơm, nău kơl, ntrŭt nsôr dŭt n’hâm bah kônh wa ƀon lan, ban nhạc dơi ndâk njêng đah băl mom ngăn 16 năm deh, têh ngăn 25 năm deh n’hanh mô hŏ tă ntĭm nti mpeh âm nhạc:

“Gâp kơt ăp nuĭh êng dơm, gâp mô gĭt pâl du ntil ndơ. Gâp nti pơng mbrơi mbrơi dơm. Ăp măng gâp tât ta aơ gâp nti lĕ đŏng. Nhạc aơ ri gâp gŏ an ăp băl mom êng ôi taơ kơ lak uănh tĭng gâp. Khân pơng saơ gâp gŏ ri khân pơng ŭch ôi taơ kơ lak khân pơng ndơn gâp”.

Yor nău gơih nti đah lĕ rngôch nău ŭch, tât aƀaơ ban nhạc mom ƀon Đăk Yo lĕ gŏ gĭt blău nklăp 100 bài gŏ. Tâm nĕ geh bơi 50 bản nhạc lah ăp nău mpât mprơ ma nuĭh Bahnar Rơ Ngao way dŏng tâm rơh lễ têh bah ntŭk gŭ rêh, kơt: Ƀư rhơn ba mhe, rhơn dak mbôr, rhơn jay mhe... A Luyến, nuĭh gŏ đơn tơ rưng an gĭt, gay dơi geh “rnoh prăk” âk nar aơ, ăp nuĭh ban nhạc rƀŭn tâm nchră nsrôih “ƀư” tĭng bản nhạc. Jêh rnôk tâm ban ŭch tâm pă ăp nuĭh nti êng đah ndơ pâl bah nơm, tât rnôk blău ri nglăp lăp tâm rmôt gay gŏ ndrel:

“Lah bài jêr ri nti way bah 4 tât 5 nar. Bài glêh, bài dơh ri nti 2-3 nar lah dơi hôm. Tâm pơh ri 2 nar nti nar prăm n’hanh nar prao. Lah ma geh yan lễ mô lah geh nar khlay kuăl jă ri ƀa ƀơ lơn. Gâp saơ văn hóa way ơm he dŭt uĕh”.

Rmôt xoang druh ndăm rchong ƀon Đăk Yo

Rêng hvi nău ŭch âm nhạc way ơm, ban nhạc mom ƀon Đăk Yo dơn geh nău kơl, ntrŭt nsôr dŭt n’hâm bah nuĭh ƀon lan dăch ngai. Lôch dơi bah ban nhạc lah nău bôk năp gay ăp băl mom ƀon Đăk Yo ndâk njêng Rmôt xoang druh ndăm rchong bah ƀon đah 14 nuĭh lah kon hŏk n’hanh druh ndăm jêt ngăn mhe knŭng 10 năm. Wa Trần Công Thanh, Groi Kruanh UBND xă Hơ Moong, nkuăl Sa Thầy mĭn lah, aơ nău dŭt rhơn tâm nău mât ndrăy, ƀư uĕh ăp nău khlay âm nhạc way ơm bah rnoi Bahnar mpôl Rơ Ngao:

“Xă geh âk nghệ nhân yơn ăp nghệ nhân aƀaơ ranh lĕ hôm, mô ngăch. Ăp mon ta aơ lah rgum nti văn hóa chĭng gông ta aơ geh du nău mbơh rhơn ngăn gay mât ndrăy nău uĕh văn hóa rnoi mpôl đêt bah ƀon lan ta ntŭk”.

Râng đah nuih n’hâm gơih nđơr, ŭch êng, ban nhạc bah ăp băl mom rnoi Bahnar, mpôl Rơ Ngao ta ƀon Đăk Yo, xă Hơ Moong, nkuăl Sa Thầy, n’gor Kon Tum dôl rgop mât ndrăy, mât uĕh nău khlay âm nhạc way ơm tâm nău rêh ăp nar bah nuĭh ƀon lan. Ăp nău nteh uĕh rnê rhơn nău tâm rŏng bu druh, bu klô ndăm, nău tâm ŭch rnăk wâl n’hanh nău rŏng ƀon tơm, neh dak nteh n’glŏ mro ta ƀon Đăk Yo dôl rgop ƀư uĕh tay nău rêh văn hóa nuih n’hâm bah nuĭh ƀon lan ntŭk aơ./.

          Nuĭh rblang: Y Sưng Phê Ja