VOV4.M’Nông- Nar 28/4, mpôl pah kan bâh Hội đồng Di sản văn hóa ngih dak geh rơh pah kan đah UBND n’gor Gia Lai mpeh nău dăn đă bâh UNESCO đah ăp ntil di sản phi vật thể, ndơn kan bâh kon nuĭh, mât n’hanh n’hao nău khlăy di tích ngih dak, ndơ khlăy bâh ngih dak. N’gor Gia Lai geh 33 di tích, ntŭk di tích lĕ geh pă dăp uănh năl. Tâm nĕ geh ndru di tích Tây Sơn thượng đạo ( nkuăl têh An khê) geh kơp dơn lah di tích gâl ngih dak dŭt khlăy, ndrel đah 8 di tích ngih dak n’hanh 16 di tích gâl n’gor êng. Ta meng nĕ, Nău ueh êng mpeh chĭng gong, nkoch ndrong rnoi Bahnar, kuăl brah dăn mih bâh yang pơtao Apui, geh ndơ̆ ta rnoh di sản khlăy ngih dak.

Đah rnoh di tích An khê n’hanh nkuăl Đăk Pơ, ăp năm dăch aơ lĕ geh saơ âk ntil ndơ geh rnoh khlăy ngăn, geh năm âk jŏ klâp ma 80 rmưn năm, dơi uănh lah nău pơk trong bôk năp bâh lịch sử Việt Nam. Yơn lah, nău mât rbăy ăp di tích văn hóa khlăy aơ hôm nha geh âk nău jêr. Ta rơh pah kan, ăp nuĭh kan ndrel tâm Hội đồng di sản văn hóa ngih dak dăn đă, ta meng nĕ an geh ƀư ueh nău kan mât rbăy, n’gor Gia Lai an geh uănh ăp ntil di sản văn hóa lah nău tơm khlăy gay ma hun hao wăng sa, mpŏng tât rdâk njêng Gia Lai jêng ntŭk tât di sản ta tây Nguyên.

Nuĭh rblang: Thị Đoắt