VOV4.M’nông: Rơh tâm n’ur njroh mprơ vay ơm ăp rnoi mpôl tâm nkuăl Trường Sơn-Tây Nguyên pơk hvi tal III năm 2022 tâm ntŭk nkah ơm neh dak Măng Đen, nkuăl têh Măng Đen, nkuăl Kon Plông, n’gor Kon Tum, ndrel đah nau ƀư ăp nau ơm, nau pâl ueh ơm, nau ôp brah, ăp nau ƀư njroh mprơ, nsoh nah ao bah rnoi nơm...hôm geh nau rgum rƀŭn bah ăp ntil ndơ sa bah ăp nkuăl bah nau tâm rlong bah bu ur druh, bu klô ndăm hŏ rgum nŭih uănh ndrel bu năch tât

Tâm rnôk ƀư tâm n’ur njroh mprơ ăp nau vay ơm nkuăl Trường Sơn-Tây Nguyên pơk hvi tal III năm 2022 tâm ntŭk ƀư nau pâl n’aih neh dak Măng Đen, nkuăl têh Măng Đen, nkuăl Kon Plông, n’gor Kon Tum, rơh tâm rlong bu ur druh, bu klô ndăm tâm rlong gâm ndơ sa vay ơm bah rnoi nơm geh nau ueh ngăn ngên đah năch ndrel ƀon lan tât uănh.

19 nŭih tă bah 19 n’gor, geh nkuăl Tây Nguyên ndrel ăp n’gor: Tuyên Quang, Vĩnh Phúc, Bắc Ninh, Hải Dương, Hà Nam, Thanh Hoá, Nghệ An, Quảng Trị, Thừa-Thiên Huế, Quảng Nam, Quảng ngãi, Đồng Nai, An Giang ndrel nkuăl ƀon têh Hồ Chí Minh mbơh ăp nau ndơ sa kah bah nkuăl nơm geh êng. Wa Nguyễn Công Trung, Groi Kruanh N’gâng kan Văn hoá cơ sở-N’gâng kan Văn hoá, Thể Thao ndrel pâl n’aih, mbơh:

‘Rnoi nơm geh nau ngêt sa âk ntil. Phung hên mô êng knŭng tâm rlong ndơ sa ma hôm tâm rlong gâm ăp ntil ndơ sa kah bah rnoi nơm. Phung he geh ăp nar ƀư rƀŭn rgum tâm nar ngêt sa têh. Ăp rnoi mpôl koư geh ndơ gâm sa ueh êng bah rnoi nơm. Bah nau tâm n’ur aơ, phung hên mbơh ân âk mpưm nuưih ƀon lan ăp ntil ndơ sa kah vay ơm bah ăp rnoi mpôl oh nô tâm lam dak”.

Nkuăl Trường Sơn-Tây Nguyên đah ăp ntil ndơ sa ơm, kơt lah piăng prung, djăr gŭch, n’ha bum chưn...ƀư nŭih sa du tơ̆ ma nkah mro ndơ sa nê, kah ăp ntil ndơ sa nê. Wa Ksor Chung, tâm ƀon kép, nkuăl ƀon têh Plei Ku, rmôt bah n’gor Gia Lai nkoch tât nau ueh bah ăp ntil dak tak tâm rnôk gâm sa bah rnoi Jrai:

‘Ăp ntil dak tak ndơ sa ăp nar gay ma sông piăng mô lah hăn tâm mir. Geh mrăch juh ma trich, mlăng vâr ma boh, klôih blên. Hôm aơ lah play măt ndrôk, he ƀư ndơ tak ri kŏ sŏk tă bah play măt ndrôk đŏng. Boh ma trich nê hên kŏ lăp tâm bri tuh. Hôm boh aơ ri rnoi hên moh lah cờ roách, bum aơ ri hên kŏ sŏk tâm bri gay ma ƀư ndơ tak sa. Dak tak sa mô lah chưn n’ha bum blang kŏ geh n’ha cờ roách aơ đŏng. Rnoi Jrai tâm rnôk ôp brah mô lah ƀư nau ngêt sa ăp nar ri dơm hôm, hôm ăp bu năch lah geh sa du tơ̆ ri nkah mro ngăn”.

Rmôt bah n’gor Tuyên Quang mbơh tât nŭih uănh ndơ sa kah bah rnoi Dao Tiền đah ntil byăp djăr gâm pot ma n’ha chanh, puăch rpu gŭch, puăch sur gŭch, byăp cải bi tâm pot ma ka gŭch, ăp ndơ sa gâm tă bah ka bih...geh nkra ueh măt uănh, ƀô kah đŏng. Rmôt tâm rlong bah n’gor An Giang mbơh ndơ sa bah rnoi Khmer kơt lah bánh chiang, ăp ndơ sa bah play thốt nốt mô lah pot bah puăch ndrôk. Wa Lê Quang Nhuận, tă bah nkuăl ƀon têh Hồ Chí Minh mbơh ăp ntil ndơ nơm gâm sa ndrel ăp ntil bánh bao ntoh lư bah rnoi Hoa:

‘Đum sum lah nau kuăl nsum bah ăp ntil ndơ sa geh kon jê̆, geh ntô bah dih nkra ma rnih, ntô păng n’hơ ndrel tâm trôm lah puăch. Geh du đê̆ ntil đum sum geh bu ƀư bah ăp ntil đum sum kơt lah há cảo nkra ma tui, há cả nkra ma puăch, xíu mại tâm trôm geh tui ndrel puăch. Hôm êng đah ăp ntil bánh bao geh nkra mhe ndrel âk ntil lơn rđul đah ăp ntil bánh bao êng. Ntil báo bao têh 8 mlâm tăp, ntil bánh bao nơm nkra. Rup păng njêng lah kơt nau ueh rnôk uănh, rnôk sa. Ntil bánh bao play đào sa tâm ăp rnôk ngêt sa tâm ăp rnôk ôp brah mô lah tâm rnôk ngêt sa lễ tết”.

Nau gâm sa geh nau ueh yơn lŏ geh âk ntil ngăn, nê lah nau uănh saơ nsum bah âk nŭih, bu năch kŏ kơt lah âk nŭih ƀư uănh rlong sa ăp ntil sa bah rơh tâm rlong gâm sa ueh ơm bah ăp rnoi, geh 19 rmôt tâm rlong mbơh tâm rơh ƀư tâm rlong tâm n’ur njroh mprơ nau ơm ueh ăp rnoi mpôl nkuăl Trường Sơn-Tây Nguyên pơk hvi tal III năm 2022./.

Nŭih rblang: H’Thi