VOV4.Mnông-  Ôi nar 8/4, ta xã Hùng Lô, nkuăl ƀon têh Việt Trì, n’gor Phú Thọ, xã Hùng lô ƀư rơh vơt dơn lễ hội way ơm “Lễ hội Đình Hùng Lô” lah di sản văn hóa khlăy gâl ngih dak n’hanh nău mbơh ntrŭnh bâh n’gor Phú Thọ kơp dơn nău pâl nđaih văn hóa ntŭk rêh jêng Hùng lô. ƀon Hùng Lô kăl e geh ntơ lah Khả Lãm Trang, lôch nĕ rgâl jêng An Lão.

Nău nkoch kăl e an lah, ta du nar dŭt ueh, kađăch Hùng ndrel đah kon bu ur n’hanh ăp nuĭh kan hăn ta dak me Lô pâl, joi ka n’hanh uănh nău ueh dak nor. Tât nkual neh Hùng lô, kađăch saơ geh ntŭk bri dak si gle ueh, neh ntu jêng, tơm si ueh nđir nkre lah geh nău huêng khlăy jêng lah rlu ta aơ. ăp nŭh bu ranh n’hanh ƀon lan ta saơ kơt nĕ dĭng nchrăp ăp ntil ndơ vơt kađăch. Kađăch dŭt rhơn n’hanh đă ƀon lan ƀư neh, njêng ƀon, Bâh nĕ tât ba kơi, ƀon lan Hùng Lô ƀư đình mbah gay ma rbăn năm mpoh nhang mât mơh n’hanh di ta rơh nar 9- 10/3 âm lịch ăp năm geh ƀư lễ hội kahgĭt kađăch. Tĭng nău way, lễ hội đình Hùng lô geh 7 nău way tơm, tâm nĕ, lễ vơt brah huêng lah ngpăy tâm âk nău lễ khlay, geh nău kan têh ngăn đah rhiăng nuĭh tât râng vơt. Aƀaơ, ta xã Hùng Lô hôm nha geh mât 50 mblâm ngih ơm yău geh bâh 100 năm let lơ, ăp ngih jay lĕ nkah mât tay ăp nău khlăy mpeh lịch sử, ndơ ueh, văn hóa đah ăp ntil nău ueh êng nsĭt tât nău ueh bâh n’gâng kan văn hóa tuch tăm ba lŏ. Nău kơp dơn lễ hội way ơm lễ hội đình Hùng Lô lah di sản văn hóa dŭt khlăy bâh ngih dak n’hanh ntŭk pâl nđaih văn hóa ntŭk rêh jêng lah nău dơh nơih gay ma nuĭh ƀon lan Hùng lô n’hao nău khlăy di sản văn hóa, sok dŏng nău pâl nđaih an hun hao.

Nuĭh rblang: Thị Đoắt