VOV4.M'nông: Đah nkô̆ “Trường Sơn Tây Nguyên- Tâm rnglăp, săk tơm n'hanh hun hao", ta nkuâl Kon Plông, n'gor Kon Tum ƀư Liên hoan Njroh mprơ văn hóa ăp rnoi nuĭh nkual Trường Sơn- Tây Nguyên pơk hvi tâl III năm 2022. Aơ lah ngoăy tâm ăp nău kan mbah rhơn nkah ndray 47 năm rklaih luh n'gor Kon Tum (16/3/1975- 16/3/2022). Nău kan tă bah Cục Văn hóa cơ sở, Bộ Văn hóa, Thể thao n'hanh Pâl nđaih kan nsum đah UBND n'gor Kon Tum ƀư.

  Ntơm pơk rơh Lễ, Thứ trưởng Bộ Văn hóa Thể thao n'hanh Pâl nđaih Trịnh Thị Thủy ntrŭnh đă n'hanh ndrel ăp nuĭh ntơh măt pet ntơm an ƀư pah kan năm 2022 bah n'gâng kan Văn hóa, Thể thao n'hanh Pâl nđaih đah nkô̆: "Rdâk njêng ntŭk gŭ rêh văn hóa tâm dâng n'hanh pah kan mât bôk kan cán bộ".

        Lễ ntơm pơk Liên hoan Njroh mprơ văn hoá way ơm ăp rnoi nuĭh nkual Trường Sơn- Tây Nguyên pơk hvi tâl III năm 2022 ƀư tâm nău nteh n'gôr têh bah Tŭr chĭng goh gong hôr nău mpŏng hun hao tă bah ăp nghệ nhân 5 n'gor nkual Tây Nguyên, lah: Kon Tum, Gia Lai, Dak Lak, Dak Nông n'hanh Lâm Đồng tŭr goh.

Râng Liên hoan geh rlău 600 nghệ nhân, nghệ sỹ, diễn viên ăp rnoi nuĭh bah 19 n'gor, lah 5 n'gor nkual Tây Nguyên n'hanh ăp n'gor: Tuyên Quang, Vĩnh Phúc, Bắc Ninh, Hải Dương, Hà Nam, Thanh Hóa, Nghệ An, Quảng Trị, Thừa- Thiên Huế, Quảng Nam, Quảng Ngãi, Đồng Nai, An Giang n'hanh Nkual ƀon têh Hồ Chí Minh. Tât râng Liên hoan bah ƀon Kon Trang Long Loi, thị trấn Đăk Hà, nkuâl Đăk Hà, n'gor Kon Tum, nghệ nhân A Thui, 64 năm deh, rnoi Ba Nar mbah Rơ Ngao rhơn an gĭt:

       “Mpôl hên ŭch lah dơi ndjôt văn hóa way ơm bah he gay an ăp nuĭh uănh saơ. Nar dơi hao kalơ sân khấu dja, dơi tâm nđŭr đah ăp n'gor ri gâp dŭt rhơn. Dơi tâm mâp đah ăp băl n'gor êng, ăp rnoi nuĭh êng ri gay ôp nti n'hanh kơt ƀư tĭng bu”.

        Tâm măng ntơm pơk Liên hoan Njroh mprơ văn hoá ăp rnoi nuĭh nkual Trường Sơn- Tây Nguyên pơk hvi tâl III năm 2022, nuĭh ƀon lan n'hanh năch pâl nđaih hŏ dơi n'glăp săk he tâm khuh n'gôr lễ hội đah nău nteh ngŭr klêu, n'gloh ngai bah nău nteh chĭng gong n'hanh n'hŭn xoang Tây Nguyên; Djăt uănh du đêt nău njroh mprơ săk ntơr êng râng Liên hoan Njroh mprơ, kơt: Mpơl tay nău way ơm chon mbah Mẫu Tam Phủ bah Mpôl Trung tâm Văn hóa n'gor Vĩnh Phúc; Nău tâm rlong chĭng bah nghệ nhân Mpôl n'gor Quảng Ngãi; Nău ka dŏ: Nguyên Tiêu Thịnh Hội- Ngũ Phúc Lâm Môn bah Mpôl nkual ƀon têh Hồ Chí Minh; An uănh ndơ nsoh way ơm....Wa Nguyễn Công Trung, Groi Cục trưởng Cục Văn hóa cơ sở, Bộ Văn hóa, Thể thao n'hanh Pâl nđaih, an gĭt:

        “Rlău bar tơ̆ ƀư tât aƀaơ liên hoan hŏ geh du suan rhôp têh. Geh du nău mha êng lah ntơh măt bah lĕ rngôch ăp nkual ta lam dak geh măt ta Măng Đen. Puăn nar ƀư liên hoan mbra lah du rup gui văn hoá têh âk săk ntơr. Lĕ rngôch ăp nău ƀư kơt njroh mprơ, ndơ ngêt sa, ndơ nsoh way ơm bah rnoi nuĭh, ăp nău kan ma săk suan dăng đŏng. Puăn nar ƀư mô âk yơn mbra an tay nău nkah âk an ƀon lan ăp rnoi nuĭh".

        Ƀư tâm 4 nar, ntơm bah 16 tât 19/3, Liên hoan Njroh mprơ văn hoá ăp rnoi nuĭh nkual Trường Sơn- Tây Nguyên pơk hvi tâl III năm 2022 mbra ƀư ăp nău kan, lah: Ƀư ăp ntil nău pâl tâm sinh hoạt văn hóa ôp brah lah yang, lễ hội, ăp ntil nău njroh mprơ, mpơl ndơ nsoh way ơm rnoi nuĭh, ndơ uh goh rnoi mpôl đê̆ way ơm, Chĭng gong Tây Nguyên n'hanh ăp nău kan thể thao, sinh hoạt văn hóa ndơ ngêt sa.

        Liên hoan Njroh mprơ văn hóa ăp rnoi nuĭh nkual Trường Sơn- Tây Nguyên pơk hvi tâl III năm 2022 nău ŭch gay mât ndray, trêng nti n'hanh mât uĕh ăp rnoh khlay văn hóa ơm yău kăl e mô mpơl săk, nău way gŭ rêh ôp brah lah yang, lễ hội way ơm, nău njroh mprơ, ndơ nsoh, ndơ nkrơ̆, ndơ sa...bah ƀon lan ăp rnoi nuĭh nkual Trường Sơn - Tây Nguyên n'hanh ntơh măt du đêt rnoi nuĭh oh nô lam dak. Nkre lah rjăp nău nsing nơm tâm nău rđău kan bah Đảng, Ngih dak, ntơm rdâk kah tay nău mpŏng hun hao neh dak, mât uĕh tay nău mĭn rôih dăng tâm rnglăp lam rnoi nuĭh.

Groi Kruanh Ủy ban nhân dân n'gor Kon Tum Nguyễn Ngọc Sâm an gĭt: Nkhêp nkah ndray 47 năm nar rklaih luh n'gor Kon Tum, n'gor rhơn n'hao lah ntŭk dơi Bộ Văn hóa, Thể thao n'hanh Pâl nđaih sơch đăng cai ƀư Liên hoan rơh dja. Let năp tay, n'gor Kon Tum rgum tâm ăp nău kan rgum tơm kơt mât ndray, mât uĕh rnoh khlay văn hóa way ơm bah ăp rnoi mpôl đê̆ nkre đah hun hao pâl nđaih; an ƀư geh nău tam ăp đề án, trong nchrăp mpeh mât ndray ntŭk tŭr chĭng goh gong, jay rot jay jong, ndơ nsoh, nău mpât mprơ, ndơ uh goh; uănh khlay n'hanh ntop kơl âk lơn đŏng tât ăp nuĭh gĭt blău ntoh lư, nuĭh gĭt blău râng nău kan gay mât ndray văn hóa.

Nuĭh rblang: Điểu Thân