VOV4.M’nông- Aƀaơ, dŭt âk băl mom ndrel đah nuĭh ƀon lan ta ăp ƀon lang Tây Nguyên lĕ geh âk trong kan gay ma mât rbăy, n’hao nău ueh êng way ơm mpôl rnoi gay ma vơt năch pâl nđaih lôch tă geh nuh srê Covid-19 gay ma ndâk nsơm wăng sa, đăp mpăn nău rêh.

Bol ma hôm nha mom, yơn lah nô Siu Thanh, 25 năm deh, thôn Pleiky, nkuăl têh Nhơn Hòa, nkuăl Chư Pưh dŭt blău tŭr chĭng goh gong bâh rnoi nơm. Nô Siu Thanh an gĭt, nô lĕ gĭt tŭr chĭng bâh hôm nha jê̆, geh gĭt âk nău chĭng way ơm. Yơn lah, nău way tŭr chĭng ta n’gor Gia Lai lah êng n’hanh ăp n’gor tây Nguyên lah nsum dôl geh ntơm roh rui,. Yor kơt nĕ  ma tâm let năp tay, Siu Thanh ŭch geh nău mât kơl âk lơn tay bâh ăp gâl kan, n’gâng kan, gay ma mbơh tơih, mbơh n’hơ nău ueh êng chĭng gong ta ăp ntŭk kan ntoh rup ntoh ngơi, ndâk nsơm tay ăp nău way ơm ntoh lư ndrel đah nău tâm nđur chĭng gong. Nô Siu Thanh  mbơh:

“Bâh ntơm tât aƀaơ gâp lĕ dŭt nsrôih gay ma mât rbăy n’hanh mbơh n’hơ nău ueh êng nău wa ơm yor u che nklơi tay bâh kăl e, du nău dŭt rngot ngăn lah aƀaơ ƀon lan he dôl ntơm chuêl păng. Yơn aƀaơ gâp dôl ndrel đah oh nô tâm ƀon nsrôih mbơh tơih, mbơh n’hơ ăp nău ueh êng tâm nău way mpôl rnoi an lĕ rngôch ăp băl mpôl dăch ngai. N’hanh aƀaơ an geh nsrôih tay lơn tâm nău ntĭm nti an rơh ba kơi, gay ma kon său geh mât rbăy n’hanh n’hao nău way ueh êng bâh mpôl rnoi nơm”.

Lah cán bộ bâh phòng văn hóa- thông tin nkuăl Kbang, n’gor Gia Lai, Đinh Mỡi geh nău kan mât uănh du đê̆ nkual di tích lịch sử bâh nkuăl. Nău kan tơm bâh nô lah ntĭm nti n’hanh mbơh tơih an năch mpeh nău kan cách mạng bâh ƀon lan ta ntŭk tâm 2 rơh tâm lơh tâm su mprơh Pháp n’hanh Mỹ n’hanh ăp nău way ueh êng bâh nuĭh Bahnar. Bol ma bâh bôk năm 2021 plơ̆ dăch aơ, nău kan pâl nđaih ta aơ geh nău khuch tât yor nuh srê Covid-19, yơn nô hôm nha đă ƀon lan nsrôih nti, mât ăp mpôl tŭr chĭng tanh cheh. Aƀaơ, n’gâng kan pâl nđaih lĕ ntơm ndâk nsơm tay, nô n’hanh ƀon lan dŭt rhơn geh nău nchrăp ntop tay mbơh tơih ăp nău ueh, lịch sử nkual neh Kbang têh dăng đah năch tât. Nô Đinh Mỡi, cán bộ văn hóa nkuăl Kbang, n’gor Gia Lai an gĭt.

Nkual pâl nđaih lịch sử văn hóa gâl n’gor nĕ lah nkual 10 ta xã Kroong, nkuăl Kbang, n’gor Gia Lai lĕ geh ndâk nsơm ta aơ. Aơ lah nkual di tích lịch sử dŭt khlăy, tâm 2 năm ba năp, nuh srê ntưp rêng âk, n’gâng kan pâl nđaih dŭt jêr jŏt ngăn. Aƀaơ rnôk nuh srê lĕ bah oi, pâl nđaih lĕ ntơm ndâk nsơm, gâp nơm lĕ dŭt nsrôih tâm rgop đah ƀon lan ndrel ndâk nsơm rdâk njêng n’hanh hun hao tŭr chĭng goh gong, ăp nău văn hóa, ăp nău kan njroh mprơ n’hanh bâh nĕ kơl mât rbăy, n’hao n’hanh hun hao ăp ntil văn hóa way ơm rnoi nơm ueh lơn n’hanh mbơh tơih rup ueh pâl nđaih an năch tâm dak n’hanh dak bah dih tât râng. ăp nghệ nhân tâm ban kơt ƀon lan rnoi đê̆ ndrel nsum mât rbăy, mbơh tơih rup  ueh nkual neh n’hanh mbơh tơih an kon său gay ma kon său gĭt ntŭk khlăy đah cách mạng, đah nuĭh ƀon lan ta Gia Lai lah êng n’hanh lam dak lah nsum.

Ăp nar gŭ tâm ƀah ntŭk rêh jêng gay ma njrăng rdâng nuh srê Covid-19 lah mông nar ma wa Thị Pyơm, ta ƀon Bu Ndrung, xã Dak Bu So, nkuăl Tuy Đức, n’gor Dak Nông, gŭ tanh nah mbân. Wa an gĭt, rlău 60 năm krêp dêh đah nău kan tanh cheh, ê gŏ wa gĭt lah tanh cheh roh âk mông nar kơt nĕ. Aƀaơ, nău rêh lĕ plơ̆ tay kơt ơm, wa geh ntĭm nti tay nău tanh cheh an kon său gay ma mât nău ueh êng bâh mpôl rnoi.

Ăp ntil ndơ tanh gâp lĕ geh tăch lĕ rngôch. Rlău ma nĕ gâp tanh hôm nha gay ma dŏng tâm rnăk vâl đŏng. Gâp tanh âk ngăn ndơ tanh gay ma ndray an kon său gĭt n’hanh nti an kon gâp mât tay nău tanh cheh. Aƀaơ ăp nuĭh gĭt blău tanh mô âk, lah mô geh nti rĭ kon se mô gĭt tanh.

Nuĭh rblang: Thị Đoắt