VOV4.M'nông: Mhe aơ nơh, ta Hà Nội, Trung ương Đoàn TNCS Hồ Chí Minh kan nsum đah Ban Tuyên giáo Trung ương, Ủy ban Văn hóa, Giáo dục bah Quốc hội, Bộ Văn hóa Thể thao n'hanh Pâl nđaih, Radio ƀoh rup Việt Nam n'hanh Liên hiệp ăp Hội văn học nghệ thuật Việt Nam ƀư Tâm nchră “Ntŭk gŭ rêh trôm mạng n'hanh nău dơn kan mât njrăng mpêr n'har văn hoá nău mĭn nuih n'hâm bah mom ndăm”. Lah ta rnôk tâm nchră, Kruanh Ban Tuyên giáo Trung ương Nguyễn Trọng Nghĩa dăn đă ăp gưl kan Đoàn ndăn dŏng uĕh ntŭk gŭ rêh ta mạng, rnôk rgâl mbrô gay n'hao nău gĭt êng bah rơh mom ndăm mpeh nău way ơm lịch sử, ăp rnoh khlay văn hóa uĕh êng, săk ntơr bah rnoi nuĭh.

Ta rnôk tâm nchră, ăp nuĭh rgum uănh tay mpeh nău ring tam bah ntŭk gŭ rêh mạng, ăp nău rhŏ dŏng rloh rlău n'har bri đah nău dơn kan mât njrăng mpêr n'har văn hóa nău mĭn tâm rơh aƀaơ. Nkoch tât ăp ndơ geh ƀư văn hoá ta ntŭk gŭ rêh mạng, ăp nău rgop an lah, ân geh nău way mât kân đah ăp ndơ geh ƀư dja ta ntŭk gŭ rêh mạng, gay nkre đăp mpăn pă  an gĭt nău lư du trong tâm di, ngăn ngăn, kloh rsang, rƀŏng trong văn hoá an nuĭh ƀon lan, lơn lah rơh mom ndăm; njêng geh ntŭk gŭ rêh tâm ban, kloh uĕh gay ăp jâng nsing, ăp ndơ geh ƀư  văn hoá ta trôm mạng tâm dak hun hao.

Gay druh ndăm nsum ti mât njrăng jâng nsing văn hóa nău mĭn ta trôm mạng, PGS.TS Nguyễn Thị Thu Phương, Viện Trưởng Viện Văn hóa Nghệ thuật quốc gia Việt Nam (Bộ VHTT&DL) an lah, ân njêng luh trong kơl an rơh druh ndăm blău mĭn mhe.

"Ndơ geh wăr ƀư an khân păng nsing nơm, khân păng gĭt wât, ân geh ăp rơh rgum nchră mô lah ăp bôk nău kan geh way nkô̆, mô lah ƀư âk lễ hội...ăp bôk nău kan nê lah lah trong nta geh ntŭk gŭ rêh gay rơh mom ndăm buăt nthoi gĭt đah kăl e. Mô geh du trong ƀư khuh n'gôr lơn, ring tam lơn rnôk nuĭh druh ndăm nơm rgâl jêng êng ăp ntil mpeh rnoh khlay n'gâng tơm ma ăp trong mpơl ƀư mhe, trong uănh năl mhe bah khân păng".

Lah ta rnôk tâm nchră, Kruanh Ban Tuyên giáo Trung ương Nguyễn Trọng Nghĩa rnê âk Mpôl druh ndăm Việt Nam hŏ n'hanh dôl ƀư âk trong leo kan, ƀư jêng ngăn ngăn gay rgop mât ndray, mpư n'hao săk ntơr văn hoá rnoi nuĭh, mât njrăng mpêr n'har nău mĭn văn hóa tâm rơh rgâl mbrô. Nê lah hang rbăn rơh sinh hoạt chính trị, ăp nău kan rlong gĭt mpeh tu tăm, hăn uănh pâl bảo tàng, ntŭk têl ơm yău kăl e. ăp rơh tâm rlong joi gĭt mpeh văn hóa, nău way ơm lịch sử bah rnoi nuĭh ntoh nar lơn ma âk, lơn lah nău dŏng công nghệ mbrô an ƀư âk dăng lơn. Mpôl kan Đoàn, mpôl kan Hội hŏ geh âk nău blău ƀư mhe, ntop kơl tơm prăk, mbơh nti trong kan, tơm nuĭh kan kơl an druh ndăm ntơm njêng nău kan rgâl mhe ta âk trong kan, âk trong ƀư, tâm nê geh âk doanh nhân mom hŏ geh nău dơi tâm trong kan công nghiệp văn hóa, đah ăp ndơ geh ƀư văn hóa ndjôt săk tơm mpeh nkual, nkre đah văn hoá pâl nđaih, đah công nghệ uĕh mhe.

Yơn lah, tâm rnôk cách mạng công nghiệp tâl 4, đah nău hun hao dăng bah khoa học n'hanh công nghệ, bah rgâl mbrô, Kruanh ban Tuyên giáo Trung ương Nguyễn Trọng Nghĩa dăn đă ăp gưl n'gâng kan Đoàn ndăn lĕ nău săk geh dơh uĕh bah ntŭk gŭ rêh mạng, rnôk rgâl mbrô gay n'hao nău gĭt êng bah rơh druh ndăm mpeh nău way ơm kăl e, ăp rnoh khlay văn hóa mha êng, săk tơm bah rnoi nuĭh tâm ban kơt ntŭk gŭ  kan, nău khlay kan văn hoá rnôk hun hao neh dak.

“Ăp gưl n'gâng kan Đoàn ndăn dŏng lĕ nău geh trôm mạng, rnôk rgâl mbrô gay n'hao nău gĭt êng bah rơh kơn druh ndăm mpeh nău way ơm kăl e, ăp rnoh khlay văn hoá uĕh êng, săk  tơm bah rnoi nuĭh tâm ban kơt mpeh ntŭk gŭ kan, nău khlay kan bah văn hoá đah rnôk hun hao bah neh dak. Tâm rơh cách mạng công nghiệp 4.0, mpôl kan Đoàn ân rgum gŭ mĭn, ntrŏng năl ăp trong nkra ntop kơl druh ndăm ntơm njêng nău kan rgâl blău mhe kalơ trong kan văn hoá; leo ƀư, ntuh kơl, ntop kơl ăp rơh tâm rlong, trong nchrăp ntơm njêng nău kan mpeh văn hóa, ăp nău mĭn, ndơ geh ƀư văn hóa rnoh khlay têh, geh suan ring tam tâm  druh ndăm rchong".

Ta rnôk tâm nchră, ăp nuĭh ntơh măt rgum tâm nchră ăp nkô̆ mpeh gĭt năl nău khlay, ring tam tât bah trôm mạng đŏng, ăp ndơ rhŏ dŏng rloh rlău n'har bri đah ntŭk gŭ kan mât njrăng mpêr n'har văn hóa nău mĭn tâm rơh aƀaơ; nău ngăn geh n'hanh trong nkra gay mpư n'hao rnoh khlay văn hóa way ơm bah rnoi nuĭh he rgop tĭng ƀư ntrŭt ntrôl ăp n'gâng kan công nghiệp văn hóa ta Việt Nam hun hao, luh tât lam ntŭr neh… Du đêt nuĭh an lah nău dăn đă trong mât uănh đah ăp ndơ geh ƀư văn hoá ta trôm mạng; kơl nsŏng, rƀŏng trong gay kơl mpôl druh ndăm Đoàn Thanh niên cộng sản Hồ Chí Minh, ăp gưl, ăp n'gâng kan n'hanh druh ndăm Việt Nam râng ƀư ngăn ngăn lơn, jru hvi lơn tâm pah kan mât njrăng mpêr n'har văn hóa nău mĭn nuih n'hâm./.

Nuĭh rblang: Điểu Thân