Tâm nău kan liên hoan âm nhạc lam dak geh ƀư ta nkuăl ƀon têh Buôn Ma Thuột, hội nhạc sĩ Việt Nam tâm rgop đah Hội văn học Nghệ thuật n’gor Dak Lak ƀư rơh tâm nchră Âm nhạc dân gian Tây Nguyên tâm nău njroh mprơ aƀaơ. Rơh tâm nchră geh âk ăp nuĭh văn nghệ sĩ tât râng tâm mbơh ôp đah âk nău tâm nchră geh âk nkô̆ nău na nê̆.

        Ta rơh tâm nchră, ăp đại biểu tâm mbơh mpeh ăp nkô̆ nău kơt lah: nău tă gĭt kan mn rklă dŏng ăp ntil nău mprơ way ơm bâh ăp mpôl rnoi ta ntŭk; sŏk dŏng nău ueh nău nteh bâh ƀon lan ƀư êng gay ma ndơ̆ tâm ăp nău rklă nchih mhe, nău ueh njroh mprơ tâm nău nkoch ndrong Tây Nguyên; nău ueh êng njroh mprơ Tây Nguyên tâm nău rêh n’hanh nău hun hao bâh nău njroh mprơ aƀaơ. Ăp đại biểu an lah, gay ma rklă nchih du nău mprơ geh tĭng kơt nău mpôl rnoi mô lah nkual neh, nuĭh rklă nchih năp lor an geh gĭt, gĭt vât nău mprơ nău tâm pât ta ăp nkual, ăp ntŭk bâh ăp nău mprơ, tâm pât n’hanh tŭr chĭng goh gong bâh ƀon lan geh ƀư âk, nău ntoh lư êng bâh mpôl rnoi nĕ. Bâh nĕ geh rklă nchih âk nău êng, mĭn uănh n’hahnh sŏk nĕ ƀư bôk nău gay ma dŏng kơt ta ăp nău rklă nchih mhe. Nhạc sĩ Mạnh Trí ta Dak Lak mbơh rgop nău.

Mpeh đah nău tơm khlăy an geh lăp kan na nê̆, mât rgum rbăy gay ma gĭt nău mprơ, djăt du tơ̆ lah bu gĭt dâl aơ lah bâh nău tâm pât mơh rnoi mpôl, rĭ rnôk nĕ rklă nchih nău mprơ mhe mơ hăn tĭng di mô lah păng jêng nău êng, gâp mô geh ndra ma ƀư yơn ma păng luh ngai jêng lah păng mbra roh nău ueh êng bâh du nkual nĕ.

        Âk đại biểu lĕ geh n’hao nău mbơh tơih nău mĭn nơm an geh uănh năl n’hanh mât rbăy, n’hao ăp nău tâm pât mprơ gay ma hun hao ăp ntil ndơ nău mprơ mhe ta rơh aƀaơ. Yơn lah, nău hun hao aơ an geh nău mpŏng kan na nê̆ n’hanh an geh mât dơi nău tu tơm tâm trong hun hao, der geh ƀư roh nău ueh êng n’hanh nău tu tơm bâh nău tâm pât mprơ rnôk ma sŏk dŏng ndơ̆ lăp gay ma njêng du ntil ndơ âm nhạc mhe. Nhạc sĩ-nghệ sỹ ưu tú A Đuh ta n’gor Kon Tum ngơi:

  Tĭng gâp mĭn mô dơi ƀư êng tĭng nău mprơ ơm bâh bu, nĕ lah nău mprơ ơm an geh mât kơt ơm. Hôm mpeh nău hun hao, knơm ta ăp nău tu tơm nĕ he ma hun hao, nĕ lah nău ma ntŭk kan êng mô di lah sŏk bâh tu tơm nĕ gay ma ƀư khuch ndơ tu tơm bâh păng, nĕ lah nău tih bâh nơm, hôm nơm an geh dŏng lĕ păng nơm, bâh nău mprơ nĕ mô lah nău nĕ he an geh ƀư an ueh lơn tay rĭ păng mơ di lah hun hao, mĭn kan”.

        Đah 12 nău tâm nchră ngơi geh ntoh ngơi ta bôk nău kan, ăp đại biểu lĕ lah na nê̆ gay ma joi ăp trong kan mĭn rklă nău kan âm nhạc an tâm di đah nău rêh aƀaơ n’hanh ryơk rnê dơi nău ueh êng bâh âm nhạc dân gian, nău way ơm bâh ăp mpôl rnoi Tây Nguyên. Nhạc sĩ Đỗ Hồng Quân, kruanh hội đồng nghệ thuật Hội nhạc sĩ Việt Nam uănh rnê. Aơ lah bôk nău kan geh nău mhe n’hanh ăp nău tâm rgop, nău ntoh ngơi bâh đại biểu geh tĭng bôk nău khlăy. Rơh tâm nchră lah nău kan mĭn uănh nduĭh lah geh âk nău khlăy ta rơh tâm mâp tâm nđŭr njroh mprơ lam dak rơh aơ. Nhạc sĩ Đỗ Hồng Quân ngơi.

Đah ăp nău tâm nchră ngơi, nău ntoh ngơi rĭ ăp nuĭh lĕ geh du nău ch rŏng nsum lah mhâm ƀư gay ma nău njroh mprơ bâh Tây Nguyên, bâh he mô dơn lah mât kơt ơm, mât rbăy ma hôm nha geh ăp nău an hun hao, geh ƀư bâh ăp tác phẩm mhe bâh ăp nuĭh nchih rklă nău mprơ nar aơ. N’hanh nău dŭt khlăy ngăn tay lah mô dơn geh dŏng, dŏng ăp nău mprơ ơm bâh ăp mpôl rnoi Tây Nguyên ma nău nĕ rĭ gay ma an he geh rklă  tay ăp nău mprơ mhe, ăp bôk nău mhe, rĭ kơt nĕ mơ dơi geh n’hao nău kơt ơm n’hanh tâm di đah nău ŭch rŏng bâh ƀon lan, nĕ lah nău mprơ an geh hăn bâh bâh ƀon tât nău rêh mhe”.