VOV4.M’nông:   Đah bôk nău “Hãy sống và hy vọng”, Nar thơ Việt Nam rơh tal 20 ta Dak Lak lĕ ƀư bah nar 15 tât 17/2, ta trong Ndrôm sam ƀŭt-Cà phê Buôn Ma Thuột. Bôk nău kan yor Hội Văn học nghệ thuật n’gor Dak Lak tâm rgop đah N’gâng kan Văn hóa Thể thao Pâl nđaih ƀư đah âk nău ƀư uĕh, geh âk rup gui văn hóa bah ăp rnoi mpôl ta ntŭk.

Pơk bôk đah nău tŭr chĭng n’hanh nău ƀư jă ngêt ndrănh wơt năch bah nuĭh Êđê, Nar thơ Việt Nam rơh tal 20 ta Dak Lak wăch rgum âk năch pâl nđaih tât râng. Tâm ntŭk ntô pơk hvi ta Trong ndrôm sam ƀŭt-cà phê Buôn Ma Thuột, ăp năch pâl nđaih dơi djăt uănh âk nghệ thuật, tâm rgop đah ăp nău njroh mprơ tŭr chĭng, gŏ gông rnoi mpôl đêt, răk thơ, mprĭng thơ n’hanh âk nău ƀư ngăn kơt vẽ ký họa chân dung, rup trah mon si, dăn rplay sam ƀŭt thư pháp, mpla nsơ rup, ndah nghệ thuật... Nghệ sỹ Linh Nga Niê Kđăm, ta nkual ƀon têh Buôn Ma Thuột, gĭt saơ nkoch:

“Tâm rơh chôt srê Covid he dơi ƀư kơt aơ lah dŭt uĕh, âk ntil đah nkô̆ nău n’hanh ăp nău ƀư, gâp saơ dŭt âk n’hanh geh nău tâm rgop uĕh, dŭt geh văn hóa. Mpŏng ăp nar kơt aơ mbra geh tay âk băl ŭch thơ, ŭch văn học dơi ntop hao, n’hanh văn hóa nău ŭch răk bah nuĭh Việt mbra hao uĕh tay”.

Mpăr nsơr thơ tâm Nar Thơ Việt Nam ta Dak Lak

Dŭt khlay, tâm nar ntơm ƀư nar thơ Việt Nam ta Dak Lak lĕ sŏk ƀư tay gâl nău mprơ nkoch khan Mdrong Dam, nkoch mpeh du hê nuĭh janh dăng tâm ot ndrong Êđê. Aơ lah rơh bôk năp ntil ndơ dơi ndơ̆ tâm ntŭk njroh mprơ, ƀư tâm ntŭk ntô gŭ rêh ta nkual ƀon têh Buôn Ma Thuột. Nghệ sĩ ưu tú Vũ Lân, nuĭh gŭ mĭn njêng văn hóa dân gian Tây Nguyên uănh lah, nău ndơ̆ mprơ nkoch khan tâm nkô̆ nău gay geh nău uĕh, êng geh bah Tây Nguyên tâm nar rgum thơ ca bah neh dak.

Băng: “Gâp ŭch ngăn lah nkoch “Klei Khan”, jêng lah nkoch khan bah nuĭh Êđê. N’hêl na nê̆ nĕ lah du thể thơ bah nuĭh Tây Nguyên, khân pơng joi nău ngơi tâm prĭng, tâm hôr, tâm joar, lơn lah ăp nău mprĭng, khân pơng joi nău tâm tĭng nău ngơi ri jêng nău mprĭng thơ văn an nău ngơi nĕ. N’hanh er nĕ lŏ dŭt rjăp đah er bah ăp nău mprơ Tây Nguyên. Nĕ lah nău dŭt n’hâm uĕh”.

Bôk nău ƀư Nghệ thuật đah âk nău njroh mprơ uĕh, geh êng Tây Nguyên.

Đah bôk nău “Hãy sống và hi vọng”, bôk nău nar thơ hôm e geh ăp nkô̆ nău rêng nău ŭch rŏng kơt an ndơ nghệ thuật gay tăch, ƀư prăk krem ntop kơl nuĭh ji ach o, nău ƀư mprĭng thơ njuăl ăp nuĭh nău ŭch mpeh thi ca n’hanh nău rêh uĕh. Wa Niê Thanh Mai, Kruanh Hội Văn học Nghệ thuật n’gor Dak Lak an gĭt, bôk nău kan mbra jŏ tât lĕ nar 17/2 đah nău ŭch rêng lam hvi tay nău ŭch văn học nghệ thuật tât nuĭh ƀon lan.

“Mpôl hên dŭt ŭch nar rgum an êng ăp nuĭh ŭch thơ ca ngăn ngên, yor rĭ tâm bôk nău kan nar aơ nkô̆ nău n’hanh nău ntĭt mpơl bah văn hóa Tây Nguyên dơi ƀư. N’hanh tâm bôk nău kan măng aơ “Sống và hi vong”, mpôl hên mbra geh âk rmôt gưl Tây Nguyên ơm kăl e, nuĭh thơ n’hanh nău ŭch, thơ n’hanh yan puh ndrel ăp nău ŭch uĕh mhe gay njuăl tât âk kônh wa n’hanh băl mpôl tĭng nuih n’hâm ăp nău răm tât an ăp nuĭh ŭch thơ ca”.

                              Nuĭh rblang: Y Sưng Phê Ja