Gay geh ndơ sa bah trĭch, an geh nău nchrăp uĕh bah ndơ n’hanh trong nkret ƀư. Lor lah săch ăp rsoăn trĭch têh, âk tăp ta n’ging si prêh ta tâm bri, mper mir mô lah mper dak me gay kloh uĕh rnôk nkret gâm ndơ sa. Ăp rsoăn trĭch geh âk tăp dơi uănh lah ăp ndơ sa bah bri đah nău ƀô kah, lăi. Rnôk uĕh ngăn hăn joi trĭch lah bah bôk khay mih n’hanh jêh yan kăch rek lŏ mir.

Nuĭh Êđê Bih ta êp dak me geh nkao rù ri (Djam tang) way gâm trau srat đah trĭch dŭt ƀô kah. Ƀô srat ntop đah tăng bah nkao rù ri tâm rnglăp ndrel dŭt kah. Hôm nuĭh Êđê Adham way tâm pot trĭch đah ka rneng, ka khon mô lah juh đah play mhung ƀư ndơ sa săch, juh bôh lĭp ăp ndơ sa poăch kro, trau bum srung... Yuh H’Djun Niê (way kuăl lah  Amĭ Tân), ta ƀoh Sah A, xă Ea Tul, nkuăl Čư M’gar, n’gor Dak Lak an gĭt, du nkual geh trong nkret gâm êng êng yơn mât nău srat, bah trĭch.

Ka rneng ri rao kloh n’hanh djôt hăn gŭch đah ŭnh rnga gay kah lơn. Jêh nĕ săch lĕ nting ka. Trĭch ri ih kro du nar jêh nĕ wâr, mô an ngi. Jêh nĕ rlŭk pot đah ka rneng. Tâm ndơ sa aơ geh hăng bah mrăch, klôih, n’ha chanh, mrăch, gir jêng du ndơ dŭt kah. Aơ lah du ndơ sa dŭt kah bah nuĭh Êđê he bah kăl e tât aƀaơ.

Rlău ma ƀô srat êng bah trĭch tâm ăp trau, ndơ sa tănh play mhung mô lah ăp ndơ êng ri trĭch hôm dơi juh đah ăp ntil n’ha kơt gir, klôih, n’ha tăng mô lah juh đah ka kro jêng ăp ndơ sa mô đêt ƀô kah. Yuh H Đim Niê (way kuăl lah Amĭ Linh) ta buôn Ayun, xă Ea Kueh, nkuăl Čư M’gar, n’gor Dak Lak an gĭt, bôh mrăch trĭch mô dơi mô geh rnôk geh poăch sŭr pâr ŭch mô lah poăch ndrôk du nar ih. Bôh mrăch trĭch dơi sa đah piăng duh, trau srŭng, ƀư trau pot mô lah lĭp ăp ntil play kơt play rba, play khuăr, play plưh...

Bôh trĭch an bôh, ƀŏt ngot, đêt mlăng juh nsum. Trĭch ri ih krong, ntop du đêt tiêu an ƀô kah rnôk lĭp poăch bâr kro. Rnôk joi trĭch juh bôh mrăch ri mô sŏk tăp bah trĭch gay dơi mât dak srat bah trĭch.

Ăp ndơ sa bah trĭch mô dơi mô geh đah năch rnôk tât jâng ta Tây Nguyên. Đah ăp năch rơh bôk năp saơ ăp ndơ sa bah trĭch mbra mô dơi ât. Yơn rnôk lĕ rlong sa du tơ̆ mbra mơng dâl mô dơi gĭt. Ăp ndơ sa bah trĭch bôl dơh yơn kah, geh âk nău kah êng bah yôk bri têh.