Tơm kao ƀô kah lah du ntil tơm si prêh bâh 4-10m, kao mau nglang rkŭm, geh hon âk ta Tây Nguyên n’hanh du đê̆ ntŭk êng kơt Tây Nam Bộ. Tơm kao ƀô kah way geh luh kao ta khay 11 tât khay 2 năm ba kơi rĭ geh play. Tơm kao ƀô kah mbra dơi tăm ƀư ueh ta jay n’hanh geh rnoh ndơ kah khlăy đŏng.

Nuĭh Rđe way geh dŏng n’ha nse, tât kao, tât play bâh ntil tơm si aơ ƀư ndơ sa dŭt kah. Tĭng nău way bâh ndơ sa bâh ăp nkual ma geh nău nkret gâm êng êng bâh ăp ndơ sa bâh kao ƀô kah êng êng, nuĭh Rđe Bih ta nkuăl Krông Ana geh ƀư gâm sa bơi tâm ban kơt ƀon lan Tây Nam Bộ lah gâm nsum đah tui ka rêh. Yuh H’Nuah Êban, Buôn Trấp, nkuăl têh Buôn Trấp, nkuăl Krông Ana, n’gor Dak Lăk nkoch, aơ lah ndơ sa dŭt bên bâh ƀon lan, trôk nđik geh tay ndơ sa tăng, hăng, njŭng n’hanh ƀô kah bâh tơm kao ƀô kah rĭ dŭt lăp sa ngăn.

“Mpôl hên way geh gâm nkret kao ƀô kah đah blân tăng n’hanh ka dak me. Nkre lah tĕ âk mbrăch hăng, jăm tăp, n’ha klôi. Kao rĭ tôch jăng i nkong, mbuh kao. Gâm đah blân tăng rĭ tĕ du đê̆ dơm, yơn mô dơi mô geh mbrăch hăng, n’ha klôih n’hanh jăm tăp. Rlău ma nĕ rĭ gâm dak đah ka geh nhup ta dak me kah đŏng.

Hôm yuh H’Rut Niê, buôn ky, phường Thành Nhất, nkuăl ƀon têh Buôn Ma Thuột, Dak Lăk nkoch ndơ sa bâh kao ƀô kah way geh tâm ăp rơh sông sa rnôk hăn mir pĕ cà phê, yor dơh joi, dơh geh dơh ƀư n’hanh dŭt kah . Ntil kao aơ dŭt dơh hon, sui găr tâm neh, tâm mir tơm mbra hon êng. Tơm lo ma têh rĭ kao lơ ma âk. geh âk nău gâm sa bâh kao ƀô kah aơ, mbra dơi gâm pop lĭp dak măm sa, mô lah gâm đah poăch ndrôk, poăch sŭr mô lah poăch djăr yơn lah nău way gâm geh âk nuĭh ŭch sa lah đah ka kro mô lah ka hâp. Yuh H’Rut Niê an gĭt.

  “Ta ăp khay trôk nđik mô dơi mô geh ndơ sa bâh kao ƀô kah aơ. Gâp way pĕ kao rao kloh, kĭch nkong, lôch nĕ gâm đah ka kro mô lah ka hâp tĕ boh bôt ngot, mbrăch, jăm tăp. Ndơ sa bâh nuĭh Rđe he geh âk ndơ sa kah ngăn”.

Yuh H’Rut Niê an gĭt tay, nău ƀư gay ma gâm kao aơ kah kơt tĭng ta ƀon lan way gâm nĕ lah vâr lor ka kro, lôch nĕ tĕ kao ba kơi n’hanh rnôk kao rĭ rĭ mpli nsum đah ka lĕ vâr lor, ndrel đah ăp boh mbrăch kơt nĕ mb ra geh mât nău kah n’hanh tăng njŭnh bâh ka. N’hanh du ntil ndơ mô dơi mô geh lah jăm tăp an geh vâr lor an ƀô kah.

Đah nău gâm dơh kơt aơ yơn nău ƀô kah ngăn, kao ƀô kah lah ndơ sa way bên tâm rơh sông sa bâh nuĭh Rđe. Ndơ sa kah gĭt tât nar nđik sial gŭ ta nă ŭnh rnga du đê̆ tăng, du đê̆ njŭnh bâh kao. Bol ma dơh joi yơn ăp nuĭh hăn ngai mbra kahgĭt mbro.