VOV4.M'nông: Tât đah ndơ sa bah nuĭh Rđe rlău ma ndơ sa kah mha êng bah ăp ntil joi bah bri hôm geh ăp ndơ sa rsang rnglăy bah kao bri đŏng, kơt kao play lhŭng, kao poh lŭng, do prit...Nuĭh Rđe dŏng kao gay gŭch gâm jêng ăp ndơ sa kah, jêng dak si săm ji dŭt geh nău tam. Tâm nê mô dơi mô nkoch tât ndơ sa kah uĕh bah kao rmĭt bri.

   Tâm nklăp khay puăn, khay 5 lah kao rmĭt bri tâm rlong luh dang kao. Nuĭh Rđe hôm tâm jă anh sah hăn joi kao rmĭt bri. Ntơm bah kăl e nuĭh Rđe hŏ gĭt gâm ndơ sa bah kao rmĭt bri hôm. Yor kơt nê̆, rup gui kao rmĭt bri (djam muôi) hŏ dơi nkah tât tâm ăp nău mprĭng n'hanh nău rŏ bah nuĭh Rđe hôm. Ntil tơm dja dơn luh dang kao lôch ăp rơh tŭp mih bôk năm dơm. Mô dơn rup uĕh rsang rnglăy bah yôk bri Tây Nguyên ma ăp tơ̆ sông sa geh trău ƀư bah ntil kao rmĭt bri ri ndoh piăng mô hôm kăr du rnglăy. Yuh H’Lai Hđơ̆k, Buôn Čuôr Knia, Xã Ea Bar, nkuâl Ƀuôn Đôn n'gor Dak Lak an gĭt, kao rmĭt bri gŭch gâm ƀư jêng âk ntil trău sa kah. Lôch rnôk hăn pĕ nsĭt plôk lĕ tôr kao, hôm rong tay glo tâm trôm tal dak dơm. Aơ lah ndơ dŭt kah bah kao dŏng gay ƀư dŭt âk ntil trău sa kah.

“Trong gâm bôk năp he rao kloh, gâm gor đah dak duh, tôk an sơh dak n'hanh juh đah tuh neh. Trong ƀư tâl bar, he gâm đah dak duh, tôk an sơh dak đŏng, lôch nê wâr đah ka hấp, mô lah ka cơm, tê̆ đêt mbrăch sa dŭt kah”.

  Rlău ma nê, nkong bah kao mbra gâm gor, hôl sĭn mô lah wâr đah khŭng klơm djăr hôm mât kơt ơm n'hôl ƀô kah bah kao bri đŏng, rnoh rbăk nkrăch nkrăch bah nkong kao dŭt kah đŏng. Săk kao rmĭt bri mbra juh rêh mô lah gŭch đah ŭnh ndrel ka khô, boh mbrăch n'hanh bột ngọt juh hăch jêng ndơ sa kro. Nô Y-Đăp Êya, Buôn Nui, xã Tâm Thắng, nkuâl Cư Jut, n'gor Dak Nông nkoch, ntơm nơh, rnôk ăp tơ̆ hăn luh mir nuĭh ƀon lan pĕ anh nsĭt ƀư trău sa. Yơn aƀaơ geh âk năch hăn joi rvăt kao rmĭt bri sĭt gâm sa jêng tâm khay luh dang kao nuĭh ƀon lan joi tăch an ăp nuĭh rvăt gay ntop joi geh tơm wăng sa. Yor kơt nê̆ ntil kao mha êng dja jêng mpêt khlay đŏng.

“Kao djam muôi hon tĭng nkual. Uănh tĭng nău ŭch bah ăp nuĭh mbra geh trong ƀư gŭch gâm êng êng. Gâp ŭch gâm hôl n'hanh juh đah tuh neh, jiăm tăp, mbrăch. Aƀaơ ntil kao rmĭt bri hŏ mpêt khlay đŏng, hăn joi ta ăp ntŭk dŭt ngai mơ dơi geh”.

Khay kao rmĭt bri dơn geh du tơ̆ tâm năm dơm, dŭt n'huach lah nuĭh i hăn tât ƀon Rđe tâm rnôk dja ma mô geh rlong sa ăp trău ƀư bah kao rmĭt bri. Ntil kao rmĭt bri, kloh rsang n'hanh rsang rnglăy mô dơn vẽ jêng du păng rup uĕh an cao nguyên bazan ma hôm ƀư jêng ăp ndơ sa ndjôt săk tơm yôk bri./.

Nuĭh rblang: Điểu Thân