VOV4.M'nông: Tâm trôm bôk nău kan Liên hoan Âm nhạc lam dak dôl ƀư ta nkual ƀon têh Buôn Ma Thuột, Hội Nhạc sĩ Việt Nam kan nsum đah Hội Văn học Nghệ thuật n'gor Dak Lak hŏ ƀư Rgum nchră ndơ uh goh way ơm Tây Nguyên tâm nău rêh ndơ uh goh aƀaơ. Rơh rgum nchră wăch rgum âk mpưm ăp văn nghệ sĩ râng tâm ôp, đah âk nău nchrăp lor dăn đă ta rnôk tâm nchră geh nkô̆ jru.

Đah 12 nău nchrăp lor dăn đă ta rnôk tâm nchră dơi mbơh rblang ta bôk nău kan, ăp nuĭh tâm ôp sŏng gay joi luh ăp trong blău ƀư mhe ndơ uh goh an tâm di đah nău rêh aƀaơ n'hanh mpư rnê ăp săk tơm ndơ uh goh way ơm bah ăp rnoi nuĭh Tây Nguyên. Nhạc sĩ Đỗ Hồng Quân, Kruanh Hội đồng nghệ thuật Hội nhạc sĩ Việt Nam uănh năl: aơ lah nkô̆ ân dơi ƀư ngăch n'hanh ăp nău rgop, nău dăn đă ta rnôk tâm nchră bah ăp nuĭh geh săk jru nău way kan âk. Rơh rgum nchră lah nău kan gŭ mĭn lah uănh geh rnoh khlay ta liên hoan âm nhạc lam dak rơh dja./.

Nuĭh rblang: Điểu Thân