Lor bôk năp dơi ƀư têh gưl n'gor, pla n'hơ rup Dak Lak bôk năp năm aơ rgum ăp păng rup geh ƀư bah ăp nuĭh blău tâm n'hanh bah dih n'gor. Nkah têl văn hóa Tây Nguyên hŏ dơi treh têl kloh, geh ngăn tâm ăp păng rup n'hanh pla n'hơ dôl wăch rgum âk nău uănh khlay bah nsum mpôl lam ƀon lan.

Dơi ƀư nsing ta rơh pla n'hơ khay djang dor yôk ntơm nơh, pla n'hơ rup n'gor Dak Lak lor bôk năp năm aơ geh bơi 90 păng rup uĕh bah rlău 40 nuĭh tơm ƀư tâm n'hanh bah dih n'gor râng. Ăp păng rup dơi ƀư trah mon ma si, phấn tiên, sơn dầu, tranh lụa, in mica, sơn mài, mỹ thuật dŏng ngăn. Ăp păng rup mpơl dơi nău rêh khuh n'gôr uĕh mƀak bah ƀon lan, rup uĕh bri dak yôk nor n'hanh kon nuĭh, nău tâm rŏng ƀon tơm neh dak, nău way ôp brah lah yang, văn hóa ntĭt êng bah ăp rnoi nuĭh dôl gŭ rêh ta Tây Nguyên. Ăp rup gui way bên  kơt ƀon lan lăp khay ngêt sa têh, nău kan mir ba mô lah ăp bri dak krêp dêh đah Dak Lak dơi âk nuĭh tơm ƀư păng rup sơch đŏng. Băl Trương Nguyễn Hoàng Mai, ta phường Ea Tam, nkual ƀon têh Buôn Ma Thuột râng pla n'hơ rup uănh năl:

Ăp păng rup dơi pla n'hơ tâm jrô pla n'hơ hŏ ƀư gâp saơ dơi n'hâm n'hôr bah dor yôk neh guh, ntĭt kơt păng rup kêng măng bah meng jâng yôk bah nuĭh tơm ƀư Dương Thị Thúy Hiền, mô lah păng rup ndrâm dak bah nuĭh tơm ƀư Y Buih, mô lah Hương sắc cao nguyên bah Hoàng Duyên. Păng rup ƀư gâp dŭt nkah uĕh lah păng rup tâm rŏng tahen ƀon lan bah Phạm Văn Hải. Păng rup hŏ mpơl tay nău rhơn nđơr bah nar kăch rek kalơ dor yôk n'hanh mpơl dơi nău tâm rŏng tahen ƀon lan krêp dêh. Bah meng nê ri nuĭh tơm ƀư hŏ  dŏng ăp dak ndrak ntơr uĕh rhơn mƀak, ƀư an păng rup lơn ma jêng rêh uĕh lơn.

 Bah meng ăp họa sĩ ntoh lư n'hanh âk nău tă ơm gĭt, pla n'hơ wăch rgum dŭt âk băl mom yơn păng rup bah khân păng an saơ nău blău ăp tŏng rêng n'hanh gĭt wât mpeh văn hóa, nău rêh. Nkre khân păng geh nău đăt ndal, nănh mpơl nău mhe tâm rklă ƀư bah he. Họa sĩ mom Y Buih Niê Kđăm (deh năm 1997) ta nkual ƀon têh Buôn Ma Thuột râng pla n'hơ đah păng rup sơn dầu “Kpin Ea” (nău Rđe jêng lah "Ndrâm dak”). Păng rup geh âk nău hôr mât njrăng ntŭk gŭ rêh n'hanh mât ndray văn hóa, hŏ geh giải A ta liên hoan năm aơ. Y Buih Niê Kđăm nkoch:         

Ndơ dja lah nău nkah rnôk gâp hôm nha jê̆, mê̆ sĭt luh hăn weh ndrâm dak gay anh sĭt, gay kah ôi tay geh dak ngêt, hăn luh mir jan ba. Aƀaơ ri ndrâm dak bah Tây Nguyên he nar lơn ma kroh suăt mbrơi. Du đêt ƀon lan  mô hôm geh đŏng ôh, gâp ŭch njuăl nău mbơh gĭt lor mât tay ndrâm dak. Nê lah du nău dŭt jêr yơn gâp ŭch mbơh njrăng lor gay mât njrăng kloh uĕh nsum mpeh ntŭk gŭ rêh, gay geh du ndrâm dak kloh uĕh.

Dơi rgŏ jă ƀư bah bôk khay 10 năm aơ n'hanh rlău âk tơ̆ rvăch sơch mbơh kloh, ban tổ chức Pla n'hơ rup n'gor Dak Lak lor bôk năp hŏ nkhôm an 14 păng rup dŭt ŭeh blău, đah 3 giải A, 3 giải B, 3 giải C n'hanh 5 giải khuyến khích. Ăp păng rup râng pla n'hơ dơi sơch pla ta Trung tâm Văn hóa n'gor Dak Lak, dơi âk nuĭh ƀon lan uănh khlay. Thạc sĩ – Họa sĩ Y Nhi Ksơr, Kruanh Hội đồng nghệ thuật pla n'hơ uănh năl:

Ăp păng rup ndjôt săk ntơr uĕh da dê, lơn lah geh săk tơm văn hóa Tây Nguyên geh rnoh dŭt âk tâm rơh pla n'hơ dja. Hôm mpeh săk uĕh rup, mpôl hên hŏ sơch pe păng rup nkre ndjôt săk tơm ntơr uĕh êng bah Tây Nguyên ma nkre săk uĕh mpeh rnoh khlay hôr tâm păng rup. Tâm ndơ nkhôm rnê dŭt têh ri geh ăp nuĭh tơm rklă lah thạc sĩ, lah giảng viên bah Nhih nti đại học sư phạm nghệ thuật trung ương. Nê lah du nău ma gâp saơ mpơl nău rhơn uĕh. Yor lĕ rngôch ăp nuĭh tơm  rklă ƀư rup, họa sĩ râng rơh dja lah dŭt nău rŏng ƀon tơm neh dak da dê. N'hanh gâp mpŏng tâm pla n'hơ tâl bar nklăp mbra geh wăch rgum dơi ăp păng rup uĕh lơn, geh rnoh khlay hôr tâm păng rup uĕh lơn.

H’Xíu/VOVTây Nguyên/Nuĭh rblang: Điểu Thân