VOV4.M'nông: Ôi 9/6, ta Hà Nội ƀư lễ n'glôch jêh, pă an ndơ nkhôm rnê nău nchih "ăp nuĭh ntĭt leo ngăn dơm ma têh khlay” tâl 13 (năm 2021 - 2022) tă bah Báo Quân đội nhân dân; Vụ Báo chí - Xuất bản (Ban Tuyên giáo Trung ương) kan nsum ƀư. Ban tổ chức hŏ sơch 19 nău nchih dŭt uĕh blău gay ndơ̆ ndơ nkhôm rnê. Rơh tâm rlong dơi rgŏ jă bah khay 6 năm 2021 tât lĕ khay 4 năm 2022. Ban tổ chức hŏ dơn geh rlău 200 nău nchih râng tâm rlong ta ăp ntil báo chí.

Báo Quân đội nhân dân hŏ sơch pơk nchih ta ăp ấn phẩm bah báo 146 nău nchih ntoh lư, tâm nê Ban tổ chức hŏ sơch geh 19 nău nchih dŭt uĕh blău gay nkhôm rnê lah: 2 giải nhất, 3 giải nhì, 4 giải ba, 10 giải khuyến khích. Groi Chủ nhiệm Tổng Cục chính trị Quân đội nhân dân Việt Nam, Kruanh Ƀan rđău đă rơh tâm rlong Trịnh Văn Quyết an gĭt, ăp nău nchih hŏ rgum nkoch lam, tâm pă ăp nău tă ơm gĭt uĕh, nău nti khlay tâm trong kơt dŏng ngăn, kơt nti, ƀư tĭng nău mĭn, nuih n'hâm, gŭ rêh Hồ Chí Minh. 

Nuĭh rblang: Điểu Thân