Nkah gĭt 134 năm Nar dêh Kruanh Hồ Chí Minh, ôi 16/5, N’gâng kan Văn hóa thể thao n’hanh pâl nđaih Dak Lak ntơm ƀư mpla nsơ sam ƀŭt bôk nău “Hồ Chí Minh uĕh ngăn săk wa”. Ƀư bah aƀaơ tât lĕ lơ 26/5, mpla nsơ nkoch 80 păng ru tư liệu mpeh nău rêh n’hanh nău kan bah Kruanh Hồ Chí Minh, dŏng bah tơm prăk bah ăp Cục Mỹ thuật Nhiếp ảnh n’hanh mpla nsơ, Cục Văn hóa cơ sở (N’gâng kan Văn hóa Thể thao n’hanh Pâl nđaih) n’hanh Bảo tàng Dak Lak.

Tâm rnoh aơ, geh âk rup bah rnôk wa joi trong kơl neh dak tâm năm 1911, râng ntrong leo njrăng n’gang rklaih đăp mpăn ăp rnoi nuĭh thuộc địa an tât rnôk Wa ndâk njêng Đảng Cộng sản Việt Nam n’hanh kruanh nuĭh ƀon lan hăn tât khởi nghĩa lam dak lơh dăng, rklaih luh neh dak Việt Nam Dân chủ Cộng hòa. Rup ndah Wa tât ntĭm rđău ndâk njêng n’hanh mât njrăng ngih dak ƀon lan ƀư tơm, hăn tât tâm lơh tâm su mprơh rlăng rŭn in lơh dăng tâm lvang 1946-1954.