VOV4.M’nông: Ôi lơ 10/2, ta Bảo tàng-Thư viện n’gor Kon Tum, Hội Nhà báo n’gor Kon Tum ƀư nau ntơm pơk nar năm mhe Hội báo Xuân Nhâm Dần n’gor Kon Tum 2022 đah nkô̆ “Rhơn Đảng ueh ang, rhơn năm mhe Nhâm Dần”. Ntoh nau tâm nar ntơm ƀư, Groi Kruanh UBND n’gor Kon Tum Nguyễn Hữu Tháp lah rjăp, Hội báo Xuân Nhâm Dần n’gor Kon Tum năm 2022 lah nar rgum bah ăp nŭih ƀư báo.

Kơl mbơh ăp ntil báo chí tât nŭih răk; Bonh đă nuih n’hâm pah kan gơih, blau mhe bah rmôt nŭih ƀư báo gay ma tŏng dơi nau ŭch gĭt nau mhe bah băl răk, băl uănh. Ta Hội báo Xuân Nhâm Dần năm 2022 hôm geh âk nau kan kơt: Mbơh ăp ntil ndơ sa kah bah rnoi Ba nar, Jeh-trêng; Ntŭk mpla n’hơ rup ueh Neh ndrel kon nŭih Kon Tum; Mbơh ăp ntil ndơ OCOP bah n’gor đah 5 ndrơng ndơ...

Geh ƀư ntơm lơ 10-13/2, Hội báo Xuân Nhâm Dần n’gor Kon Tum năm 2022 lah rnôk gay ăp nŭih ƀư báo pah kan tâm ăp ntŭk kan báo chí tâm n’ur, tâm kơt ntĭm nti nau tă blau nau kan gay ma n’hao nau kan, nau dơi ƀư báo. Aơ kŏ lah rơh gay n’gor Kon Tum mbơh, nkoch ăp nau ueh mpeh nau vay ơm tât nŭih ƀon lan, bu năch tâm ndrel ba dih n’gor./.

Nŭih rblang: H’Thi