VOV4.Mnông- Măng nar 11/1 ta nkuăl ƀon têh Buôn Ma Thuột, Tổng cục Thể dục thể thao, Liên đoàn bóng bàn Việt Nam tâm rgop đah UBND n’gor Dak Lak ƀư ntơm pơk rơh tâm long ăp CLB bóng bàn ngih dak 2021. Rơh tâm rlong ntơm bâh măng 11/1/2022 tât lĕ nar 15/1/2022.

Rơh tâm rlong năm aơ rgum geh 152 nuĭh tâm rlong bâh 22 CLB bóng bàn ta 10 n’gor, nkuăl ƀon têh geh nău ŭch pâl bóng bàn dăng kơt: Hà Nội, nkuăl ƀon têh Hồ Chí Minh, Đà Nẵng, ăp n’gor Hải Dương, Hải Phòng, Khánh Hòa, Lâm Đồng, Nghệ An, Bình Dương n’hanh Dak Lak. Ăp nuĭh tâm rlong mbra tâm rlong ta 14 kôp huy chương ta ăp nkô̆ nău:Nsum bu klô, nsum bu ur, bar hê bu klô, bar hê bu ur, du hê bu klô, du hê bu ur. Tĭng ntŭk leo kan mbơh, aơ lah rơh tâm rlong geh tâm nău nchrăp tâm rlong bóng bàn ngih dak, bâh rơh tâm rlong, Liên đoàn Bóng bàn Việt Nam mbra geh săch ăp nuĭh tâm rlong ntoh blău gay ma ntĭm nti ntop ta ăp rmôt tâm rlong bóng bàn ngih dak.

Nuĭh rblang: Thị Đoắt