Nuĭh Cơ Tu Đà Nẵng ƀư pâl nđaih nsum mpôl
Thứ bảy, 00:00, 05/07/2025 VOV Miền Trung/Nuĭh rblang: Điểu Thân VOV Miền Trung/Nuĭh rblang: Điểu Thân
VOV.M'NÔNG-  Nuĭh Cơ Tu ta  ăp xã mpeh nkual yôk yang nkual ƀon têh Đà Nẵng hŏ tĭng ƀư geh nău dơi du đêt trong ntĭt leo pâl nđaih nsum mpôl homestay, pâl nđaih nsum mpôl wăch rgum năch pâl nđaih uănh pâl.

 

Nuĭh Cơ Tu ta  ăp xã mpeh nkual yôk yang nkual ƀon têh Đà Nẵng hŏ tĭng ƀư geh nău dơi du đêt trong ntĭt leo pâl nđaih nsum mpôl homestay, pâl nđaih nsum mpôl wăch rgum năch pâl nđaih uănh pâl.

 Ƀon pâl nđaih nsum mpôl Ta Lang, xã Avương, nkual ƀon têh Đà nẵng gŭ meng trong Hồ Chí Minh jêng nău nkoch. Năch pâl nđaih hăn tât ta aơ rlong hăn ndrel nuĭh ƀon lan tôch biăp, joi ƀăng, jŭr dak me  joi ka, ti he nơm ƀư êng ăp ndơ sa way ơm n’hanh djăt uănh ăp ndơ uh goh, mpât mprơ Cơ Tu ta nâm jay Gươl.

Nô A Lăng Mít, ta xã Avương an gĭt: Ƀon lan Cơ Tu ăp năm bah năp nơh nsing tâm nău ƀư mir ba ngăn dơm, nău ach o, ji sât ji ngot mƀui tĭng mbro. Ntơm bah rnôk ƀon pâl nđaih nsum mpôl Ta Lang jêng, rnăk nô Mít tâm ban kơt kônh wa tâm thôn ntơm râng đŏng. Năm 2018, nô Mít dơi ngih dak ntop kơl 40 rkeh prăk, rnăk manh tay gay nkra uĕh jay ƀư pâl nđaih homestay. Năch tât rlong uănh pâl lah geh nău ŭch, rnăk nô Lăng Mít geh rhŏ ndơ sa, an năch rlu rlău bĭch măng ta homestay rnoh khlay 100.000 prăk/nuĭh.

“Nar năch tât kônh wa dŭt rhơn nđơr, jay gâp geh năch tât manh gŭ măng hôm. Nar lơn ma hun hao pâl nđaih nsum mpôl kônh wa mbơm oi đŏng. Năch tât geh n’gon sa an năch, kônh wa tâm ƀon nău ngăn. Ntơm nơh ƀư mir ba ma mô jŭr geh ri mô geh ndơ sa, aƀaơ ƀư pâl nđaih nău rêh hŏ mbơm lơn”. 

 Ƀon pâl nđaih nsum mpôl Ta Lang, xã Avương dơi Viện hun hao châu Á, Trong nchrăp Trường Sơn Xanh tă bah nhih pah kan hun hao Hoa Kỳ kơl n’hanh Mpôl pâl nđaih Việt Nam ntop kơl ngăn dơi jao an ƀon lan mât dŏng n’hanh rhŏ an năch pâl nđaih năm 2019. Ntơm bah rnôk ƀư pâl nđaih bôk năm, ƀon lan Cơ Tu ta aơ hŏ gĭt lơn nău mât njrăng ntŭk gŭ rêh gay ƀư an pâl nđaih nkah uĕh. N’gâng kan ta ntŭk, rdâk tay jay Gươl, kơi năp nti mpeh srăch uĕh ndơ sa, njêng ăp rmôt rhŏ dŏng ndơ sa way nkret njêng ăp ndơ sa way ơm bah nuĭh Cơ Tu, rdâk tay nău kan tanh tôk, cheh tanh bok brai... Ăp nău mprơ kơt múa tân tung, da dá, ngơi hôr, mprơ hôr, nchreng an uănh ndơ uh goh bah ƀon  lan n’glăp dŏng an năch pâl nđaih rhơn nđơr. Năch pâl nđaih hôm dơi lăp uănh bri Pơ Mu, bri lim, bri đỗ Quyên yău hôm ơm kơt kăl e bah yôk bri. Wa Mạc Như Phương, Kruanh UBND xã Avương an gĭt:

“Pâl nđaih ta ntŭk mhe lăp jêng dơm, tâm rnôk an ƀư n’hao têh hvi dơi geh nău gĭt êng bah kônh wa ƀon lan. Bah nê, nău rêh kônh wa ƀư pâl nđaih nsan hao, rgop nsum tâm nău hun hao wăng sa jut jăng ji ngot n’hŭch ach  o ta ntŭk”.

 Ƀon pâl nđaih nsum mpôl ĐhRôồng ta xã Đông Giang geh 35 rnăk râng đah 82 nuĭh kan mbro. Yuh Briu Thị Hạnh, nuĭh tâm rmôt cheh tanh bok brai, ƀon pâl nđaih nsum mpôl ĐhRôồng an gĭt, ntơm nơh, cheh tanh gay dŏng an rnăk wâl nơm dơm, aƀaơ ndơ geh ƀư rhŏ dŏng an năch pâl nđaih rvăt ndơ nsĭt jêng nău rêh bah kônh wa ƀon lan hŏ rgâl. Tĭng yuh Hạnh, du blah troi cheh tanh tăch geh rnoh khlay 800 tât 1 rkeh prăk, mbân glêh 500.000 rbăn prăk, bok n’gut săk 1.200.000 rbăn prăk. Rlău ma râng cheh tanh, yuh Hạnh hôm lah nuĭh tâm rmôt n’gon trău n’hanh rmôt njroh mprơ rhŏ an năch pâl nđaih đŏng.

“Năch pâl nđaih tât rvăt ri he tăch, nuĭh ŭch geh mbân ao khân păng hăn lăp tâm jay he ri khân păng rvăt. 35 oh yuh. Ntĭt kơt bok n’gut he tăch 250.000 rbăn prăk tâm du blah, ndơ dja dơi kơp dơn lah ndơ geh ƀư OCOP, he che tanh ăp ntil ndơ êng ƀa ƀă ƀư nklâm ndơ nkah nsĭt đŏng kơt dŭng cheng, dŭng đâng điện thoại, dŭng tâl mâng nchih, uănh nsum âk ntil ndơ ngăn”.

Hŏ geh bar pe jât ƀon ta ăp xã mpeh yôk yang ta nkual ƀon têh Đà Nẵng hun hao trong leo ƀư pâl nđaih nsum mpôl, pâl nđaih  bri dak, pâl nđaih ƀon hăr blău ti kan. Nkual ƀon têh Đã Nẵng geh  âk trong ntop kơl ăp ƀon pâl nđaih kơt: N’hao dăng tâm rgop kan nsum đah ăp doanh nghiêp, công ty hăn jong nar, nuĭh tơm leo trong pâl nđaih, ntrôl dăng nău kan nkơnh n’hơ ta ăp ndơ nkoch trêng nău  lư, mạng xã hội gay wăch rgum năch pâl nđaih hăn uănh pâl, pâl nđaih rgop nta joi geh nău kan an kônh wa, n’hao nău geh đăp mpăn nău rêh, n’hŭch ach o jŏ jong.

 

 

VOV Miền Trung/Nuĭh rblang: Điểu Thân

Viết bình luận

TIN CÙNG CHUYÊN MỤC