VOV4.M'nông: Ôi (6/6), Sở Văn hóa Thể thao n'gor Quảng Bình ntơm pla n'hơ si ƀŭt, rup đah nkô̆ “65 năm Quảng Bình ƀư tĭng nău Wa Hồ ntĭm” ta Bảo tàng tổng hợp n'gor. Pla n'hơ bơi 1000 păng rup, ndrôm si ƀŭt, ndơ ơm yău khlay nkô̆ “65 năm Quảng Bình ƀư tĭng nău Wa Hồ ntĭm”.

Nkô̆ pla n'hơ nkoch du bông nău rêh, nău kan n'hanh ăp n'hâm suan têh kuâng bah Kruanh Hồ Chí Minh đah n'gâng kan cách mạng bah Đảng, bah rnoi nuĭh he. Pla n'hơ gay rgop ntĭm nti nău mĭn cách mạng, nău way ơm rŏng dak an rơh kơn mom ndăm, rdâk tay nuih n'hâm n'hao êng săk, uănh khlay êng rnoi nuĭh; ntrŭt nsôr ăp rơh kơn ƀon lan Quảng Bình pah kan jan sa n'hanh an lĕ n'hâm suan rdâk njêng ƀon tơm nar lơn ma gĭt blău, têh ndrŏng uĕh./.

Nuĭh rblang: Điểu Thân