Rnôk ăp tơ̆ tết tât năm mhe sĭt, ƀon lan ăp rnoi nuĭh ta Tây Nguyên way nkah tay ăp nău way ơm uĕh lăng bah kăl e nơh. Tâm ăp ntil ôp brah mir ba bah nuĭh Bu Nong, nsĭt ba n'hao rhe geh nkô̆ hôr dŭt khlay. Nău way dja hôm dơn hôr mpeh rnoh khlay văn hoá nuih n'hâm ŭeh êng gay mpư n'hao khlay tơm ba, ma hôm mpơl nuih n'hâm tâm rnglăp, mpŏng nău đăp mpăn an rnăk wâl, ƀon lan tâm du năm mhe. Wa Y Tiêng (nuĭh Bu Nong) ta xã Nâm Nung, nkuâl Krông Nô, n'gor Đăk Nông an gĭt nău way ƀư "Nsĭt ba n'hao rhe lah nar Tết.

          "Ôp brah, nsĭt huêng ba kăl e nơh lah dŭt khlay ngăn, lah nar rgum bah ƀon lan, kơt nar tết aƀaơ nê. Lôch rnôk nsĭt huêng ba, kăch rek ba dŭm lor bôk năp ta mir sĭt peh phe n'gon piăng ma ba mhe lor bôk năp gay jă kônh wa tât rhơn sa piăng ba mhe. Lor bôk năp lah ôp brah ba mhe lôch nê mơ ôp brah dăn an n'hâm suan kon său tâm rnăk wâl ngăch lăng dăng soih đah ăp dông piăng ndrăp ăp tŏng puăch, ndrănh....n'hơr an brah yang. ”

          Nô Rơ Châm Nguưr, tâm ƀon Jut 1, xã Ia Dêr, nkuăl Ia Grai, n’gor Gia Lai mbơh, bah năp nơh, rnoi Jrai mô geh sa tết kơt rnoi Yoăn ôh. Năm mhe bah rnoi Jrai ntơm geh tâm bôk năm mhe, vay lah tâm khay 3 ăp năm, rnôk ma ƀon lan jêh lôch kăch rek. Rnoi Jrai ntơm tâm yan ngêt khay, sa năm đah ăp nau vay ơm kơt lah sa ba mhe, lơi môch blang...Tĭng âk năm, rnôk rnoi Jrai ndrel rnoi Yoăn rêh nsum, geh nau tâm kơt nau vay, rnoi Jrai kŏ ƀư sa tết đŏng. Tâm rnôk aơ, ăp rnăk nchrăp ndơ sa gay ma vơt năch, balư mpôl tă bah ngai. Ăp nê dơi geh nchrăp ăp ntil ngăn, nau vơt năm mhe mro geh rhơn, răm, gay ma ndơn du nau rêh, lap:

          ‘Rnăk gâp ndrel kônh wa ƀon lan tâm Dêr aơ vay vâr n’ha bum blang, gâm trau pai mô lah byăp êng êng ma nơm geh tâm n’gar. Rnăk bu geh oi ri gŭch djăr, sur, têh lơn ri gŭch ndrôk nsing tâm nau geh bah rnăk nơm. Vay ri lơ Ngoai tết rnoi Jrai ôp brah ân U che nơm, nar nê kŏ lah nar ma kon sau nkah tât u che, me mbŏ. Năm mhe tâm rhơn, tâm ôp khâl gay ma geh nau rhơn, nau tâm rnglăp tâm kơl tâm nau kan kŏ kơt lah tâm nau rêh bah ƀon lan nar lơn ma hun hao nâp nâl. Bu têh ri ƀư trong leo lor ân kon sau kơt tĭng, gay ma khân păng nsôih, gơih tâm nau kan ntĭm nti ân geh du nau rêh ueh lăng lơn, geh dơi ân săk nơm, rnăk nơm ndrel ƀon lan nar lơn ma hun hao”./.

VOV Tây Nguyên/Nuĭh rblang: Điểu Thân n'hanh H'Thi